Зеленский: Ҳудудлар масаласи - тинчлик йўлидаги энг қийини

Украина президенти Володимир Зеленский узоқ масофага мўлжалланган Tomahawk қанотли ракеталарини етказиб бериш масаласини муҳокама қилмаслигини, чунки «АҚШ кескинлашувни истамаслигини» айтди. Бу ҳақда у журналистларга 17 октябр, жума куни Вашингтонда АҚШ президенти Доналд Трамп билан бўлиб ўтган учрашувдан сўнг маълум қилди.

«Биз бу ҳақда гаплашмасликка келишиб олдик. АҚШ эскалацияни истамайди», деди Зеленский. У, шунингдек, Украина бу ракеталарни олмоқчи эканлигини таъкидлади. Зеленский Tomahawk етказиб бериш борасида оптимистикми ёки пессимистикми, деган саволга Украина президенти «реалист» деб жавоб берди.

Зеленский, шунингдек, Трамп билан Россиядаги энергетика объектларига зарба бериш масаласини муҳокама қилмаганини қўшимча қилди. Бироқ хавфсизлик кафолатлари муҳокама мавзуси бўлди: «Мамлакатимиз ўт очишни тўхтатишга эришган тақдиримизда ҳам Путиннинг тажовузкорлик билан қайтишига йўл қўймаслик учун АҚШдан хавфсизлик кафолати керак бўлишидан қўрқади».

Зеленский ҳудудий масалаларни Россия билан урушдаги энг қийин масала деб атади: «Руслар ҳақиқатан ҳам бутун ҳудудни эгаллаб олишни хоҳлайди. Аммо ўт очишни тўхтатишдан олдин ҳудудлар ва бошқа жиҳатлар бўйича баъзи келишувларга эришиш керак. Менимча, биринчи қадам – ўт очишни тўхтатишга эришиш муҳим».

Зеленский Трамп билан учрашувидан сўнг ва журналистлар билан суҳбатдан олдин Европа етакчилари билан телефон орқали мулоқот ўтказди. Хусусан, суҳбатда Европа комиссияси раиси Урсула фон дер Ляйен, Германия канцлери Фридрих Мерц, Финландия президенти Александр Стубб, шунингдек, Буюк Британия, Италия, Норвегия, Полша бош вазирлари ҳамда НАТО бош котиби Марк Рютте иштирок этди.