Зеленский Tomahawk ракеталари сўровига Трампнинг муносабатини айтди

Володимир Зеленский Оқ уйда Доналд Трамп билан бўлиб ўтган учрашуви ҳақида маълумот берди.

У Америкадан Tomahawk қанотли ракеталарини сўради, аммо ҳозирча истаган нарсасини олмаганини айтди, бироқ америкалик ҳамкасбидан қатъий рад жавобини ҳам эшитмади.

«Президент Трамп «йўқ» демагани яхши, аммо бугунги кунга келиб у «ҳа» демади», деди Зеленский NBC News телеканалига берган интервюсида.

Зеленский, шунингдек, Украина Қуролли кучларининг узоқ масофага учувчи ракеталар билан жиҳозланиши Путинда жиддий хавотир уйғотаётганини айтди.

«Менимча, Путин Қўшма Штатлар бизга Tomahawk етказиб беришидан қўрқади. Менимча, у ҳақиқатан ҳам биз бу ракеталарни қўллашимиздан қўрқади. У биз унинг ҳарбий нишонлари қаерда жойлашганини билишимиздан хабардор», деди у.

АҚШ ва Украина президентлари 17 октябр куни Оқ уйда ёпиқ музокаралар ўтказди. Учрашув якунида Зеленский журналистларга томонлар қанотли ракеталар мавзусида оммавий баёнот бермасликка қарор қилганини, чунки АҚШ эскалация бўлишини истамаслигини айтди.

Трамп ижтимоий тармоқларда Москва ва Киевни зудлик билан ўт очишни тўхтатишга ва тинчлик битими тузишга чақирди. Axios ва CNN манбаларига кўра, Оқ уйда бўлиб ўтган ёпиқ учрашувда Трамп Зеленскийга Tomahawk етказиб беришдан бош тортган ва ҳозир унинг устувор вазифаси дипломатия эканини маълум қилган.