АҚШ Россияга қарши санкцияларни кенгайтириш сари қадам ташлади

5 июнь куни бўлиб ўтган овоз бериш якунларига кўра, қонун лойиҳасини 226 нафар конгрессмен қўллаб-қувватлади, 195 нафар депутат эса қарши овоз берди. Лойиҳани қўллаб-қувватлаганлар орасида 207 нафар демократ, 18 нафар республикачи ва бир нафар мустақил конгрессмен бор.

Апрель ойида Конгресс муҳокамасига киритилган мазкур ҳужжат Украина учун махсус тикланиш жамғармасини ташкил этишни кўзда тутади. Шунингдек, у АҚШ президентига Украина ва Шарқий Европа давлатларига мудофаа техникаси ва ҳарбий мулкни кредит ёки ижара механизмлари орқали етказиб бериш ваколатини қайта тиклайди.

Қонун лойиҳасига мувофиқ, Пентагон 2027 йил охиригача Украинага разведка соҳасида ёрдам кўрсатиш ҳуқуқини сақлаб қолади. Давлат департаменти эса Болтиқбўйи давлатларининг қуролли кучлари ва чегара хизматлари имкониятларини кучайтириш бўйича қўшимча чоралар кўради.

Ҳужжат Россияга нисбатан босим ўтказиш воситаларини ҳам кенгайтиради. Унга кўра, АҚШ президенти қўшимча санкциялар жорий этиш, Россияга алоқадор жисмоний ва юридик шахсларнинг активларини музлатиш, янги экспорт чекловлари ва божлар белгилаш ҳуқуқига эга бўлади.

Шу билан бирга, АҚШ ва Европа давлатлари ўртасида қурол-яроғ етказиб бериш, украин ҳарбийларини тайёрлаш ва разведка маълумотлари алмашинуви бўйича ҳамкорликни кучайтириш режалаштирилган.

Украинанинг АҚШдаги элчиси Ольга Стефанишина мазкур қарорни “муҳим қадам” деб баҳолаб, бу Вашингтонда Украинага нисбатан икки партиявий қўллаб-қувватлаш сақланиб қолаётганини кўрсатишини таъкидлади.

Энди қонун лойиҳаси Сенат муҳокамасига тақдим этилади. Агар Сенат ҳам ҳужжатни маъқулласа, уни имзолаш учун АҚШ президенти Дональд Трампга юборилади. Reuters агентлигининг қайд этишича, Трамп вето ҳуқуқидан фойдаланиши ҳам мумкин. У аввалроқ санкциялар ва ташқи ёрдам масалалари бўйича асосий қарорлар ижро ҳокимияти назоратида қолиши кераклигини бир неча бор таъкидлаган.