WP: Путин Трамп билан мулоқотда ҳарбий ҳаракатларни тўхтатиш шартини айтган

Россия президенти Владимир Путин 16 октябр куни АҚШ президенти Доналд Трамп билан телефон орқали мулоқотида ҳарбий ҳаракатларни тўхтатиш шарти сифатида Украина Донецк областидан бутунлай воз кечишини талаб қилди. Бу ҳақда суҳбатдан хабардор икки манбага таяниб Washington Post хабар берди.

Бунинг эвазига Путин Запорижжя ва Херсон областларининг Россия армияси томонидан эгаллаб олинган ҳудудларининг бир қисмини қайтаришга тайёрлигини билдирган.

Газетанинг фикрича, бу шартлар Путиннинг Аляскадаги учрашувда билдирган позицияси бироз юмшаганини кўрсатади. Оқ уйнинг баъзи вакиллари эса буни ўсиш деб баҳолади, деган нашр манбаси.

Юқори мартабали европалик дипломатнинг нашрга айтишича, Киев «ўз оёғини ҳеч нарса эвазига сотиш билан баробар» ҳисобланган таклифга рози бўлмайди.

The Wall Street Journal Трамп маъмурияти Россия билан музокараларнинг янги раундлари арафасида Киевга дипломатик босимни кучайтираётганини қайд этган. Шу билан бирга, Оқ уй Москвага қарши санкциялар режимини кучайтириш масалаларида вазминлик кўрсатмоқда. Нашр маълумотларига кўра, Америка расмийлари асосий дипломатик босимни айнан Украина бошдан кечираётганини тан олмоқда, бу Володимир Зеленскийнинг яқинда Вашингтонга ташрифи чоғида тасдиқланган ва у ерда Tomahawk ракеталарини етказиб бериш бўйича кафолат олинмаган.

Путин ва Трамп 16 октябр куни телефон орқали гаплашганди. Икки соатлик мулоқот якунида президентлар икки ҳафта ичида Будапештда юзма-юз учрашишга келишиб олишгани маълум қилинди.

17 октябр куни Трамп Оқ уйда Украина президенти Володимир Зеленский билан учрашди. Мулоқотнинг асосий мавзуси Киевга қуроллар, жумладан Tomahawk русумли қанотли ракеталарини етказиб бериш масаласи бўлган. Axios нашри маълумотига кўра, Трамп бу ракеталарни беришга рози бўлмаган ва ҳозирда асосий эътиборини дипломатияга қаратганини билдирган. Украина президентининг ўзи «Трамп „йўқ“ ҳам, „ҳа“ ҳам демагани»ни айтди.