«Орзу қилавер» – Эрон раҳбари Трампнинг сўзларига жавоб қайтарди

Эрон олий раҳбари Али Хоманаий АҚШ президенти Доналд Трампнинг музокараларни қайта бошлаш таклифини рад этди ва унинг Қўшма Штатлар Эроннинг ядровий салоҳиятини йўқ қилгани ҳақидаги баёнотини тасдиқламади. Бу ҳақда Reuters хабар берди.

Илгари Теҳрон ва Вашингтон ядровий дастур бўйича бешта билвосита музокара ўтказди, улар июнь ойида Исроил ва АҚШ Эрон ядровий объектларига бомба зарбалари берганида 12 кунлик ҳаво уруши билан якунланди.

Хоманаий шундай деди: «Трампнинг айтишича, у битимларнинг устаси, лекин агар битим мажбурлаш билан бирга бўлса ва унинг натижаси олдиндан белгиланган бўлса, бу битим эмас, балки мажбурлаш ва қўрқитишдир».

Хоманаий, шунингдек, АҚШ президентининг америкаликлар Эрон ядро саноатини бомбардимон қилгани ва йўқ қилгани ҳақидаги баёноти устидан кулган ҳолда, Трамп бу ҳақда «орзу қилишда давом этиши» мумкинлигини айтди.

Ўтган ҳафта Трамп Исроил парламентида Исроил ва ҲАМАС ўртасида Ғазода сулҳ бошланганидан кейин Вашингтон Теҳрон билан «Тинчлик битими» бўйича келишувга эришиши ажойиб бўлишини айтди. Ғарб давлатлари Эронни уранни бойитиш орқали яширинча ядровий бомба ишлаб чиқаришга уринишда айбламоқда. Теҳрон буни рад этиб, дастур фақат фуқаролик энергетика мақсадларига эга эканини таъкидлаяпти.

Сентябрь ойи охирида БМТ Эронга қарши санкцияларни қайта тиклагани маълум бўлди. Буюк Британия, Германия ва Франциянинг ҳисоб-китобларига кўра, Эрон 10 йил аввал тузилган ва уранни бойитиш бўйича чекловлардан иборат битимни аллақачон бузган.