Қўшимча функционаллар
-
Тунги кўриниш
Грин-карта мавсуми бошланиши кечикмоқда
АҚШ Давлат департаменти грин-картанинг янги мавсумини “тез орада” бошлашга ваъда бермоқда, лекин кечикиш сабабларига изоҳ бермаяпти. Тахминларга кўра, бу кечикиш 1 долларлик тўлов жорий қилиш режаси билан боғлиқ бўлиши мумкин.
Чикаго шаҳри / Фото: Kun.uz
Октабр ойининг 4-ҳафтаси тугаяпти, лекин ҳалиям грин-карта бошланмади. Ахир ҳар йили октябрнинг илк кунларида бошланарди-ку? Наҳотки Трамп бу лотереяни бекор қилиб юборган бўлса?
Агар сиз ҳам шундай шубҳада бўлсангиз, хотиржам бўлаверинг: Доналд Трамп мигрантларни қанчалик ёқтирмасин, грин-картани бекор қилиб юбориш унинг қўлидан келмайди. Чунки бу дастур президент фармони билан эмас, қонун асосида йўлга қўйилган. Қонунларни ўзгартириш эса Конгрессга боғлиқ. Ҳозир АҚШ парламентида республикачилар кўпроқ ўринга эга бўлса ҳам, грин-картани бекор қилиш умуман кун тартибида йўқ.
Хўш, лотереяни ҳеч ким бекор қилмаган экан, унда нега бу йил уни ўтказиш кечикяпти? Журналистлар бу саволга АҚШ Давлат департаментидан расмий жавоб ололмаяпти. Департамент “тез орада бошланади” деган гап билан чекланяпти холос.
Тахминларга кўра, бу кечикиш лотерея ўйнаш учун 1 долларлик тўлов киритилаётгани билан боғлиқ бўлиши мумкин. Чунки дастурни пулли қилгандан кейин, дунё бўйлаб миллионлаб одамдан бу пулни муаммосиз йиғиб олиш ҳам керак бўлади. Бунинг учун эса пухта техник тайёргарлик керак.
Агар ҳақиқатан ҳам тўлов жорий этилса, АҚШга кўчиб кетишни хоҳловчиларга бу йил Visa ёки Mastercard картаси керак бўлиши мумкин. Маълумот учун, бу карталарни бир қатор банкларнинг мобил иловаларида виртуал шаклда, текинга очса ҳам бўлади.
