Дмитриев: Зеленский урушни тугатиш сари катта қадам қўйди

Украина президенти Володимир Зеленскийнинг РФнинг Украинага қарши уруши фронт чизиғи бўйича тўхтатилиши мумкинлиги ҳақидаги баёнотлари унинг “дипломатик ечим” сари катта қадами, деб айтди АҚШда ташриф билан бўлиб турган, Россия президентининг хорижий мамлакатлар билан инвестициявий-иқтисодий ҳамкорлик бўйича махсус вакили ва РФ Тўғридан тўғри инвестициялар жамғармаси (РФПИ) раҳбари Кирилл Дмитриев CNN телеканали эфирида.

“Менимча, Россия, АҚШ ва Украина ҳақиқатан ҳам дипломатик ечимга жуда яқин. Президент Зеленский аллақачон сўз фронт чизиғи ҳақида кетаётганини тан олгани катта қадам”, — деди Дмитриев CNN бошловчиси Жейк Таппер билан суҳбатда. РФ вакили қўшимча қилишича, Украина раҳбари илгари ўз ҳудудидан россиялик қўшинларни тўлиқ чиқаришни талаб этган эди: “Шундай экан, аслида биз ишлаб чиқилиши мумкин бўлган дипломатик ечимга етарлича яқин турибмиз, деб ўйлайман”, — дея изоҳлади Кирилл Дмитриев.

Шу билан бирга, Дмитриев Москванинг “хавфсизлик кафолатлари” ва Кремл позицияларини тушунишнинг “аҳамияти” ҳақидаги баёнотларини такрорлаб, Украинадаги ҳарбий ҳаракатларни давом эттиришни ана шу билан асослади.

Кирилл Дмитриев АҚШ президенти Дональд Трампнинг Будапештда россиялик ҳамкасби Владимир Путин билан ўзи эълон қилган учрашувни бекор қилиш қарорига оид саволга жавоб берди. Унинг сўзларига кўра, давлат раҳбарлари учрашуви албатта бўлади, аммо “эҳтимол, кейинроқ”, чунки “Россия билан мулоқот олиб борган маъқул, мулоқотсизликдан кўра”.

Трамп ҳам Путин билан тайёрланаётган учрашув бекор қилинганини айтганда, саммит “келажакда” бўлишини таъкидлаган эди.

Шу билан бирга, Дмитриевнинг айтишича, Вашингтон ва Москва маҳбуслар алмашинувини давом эттириш имкониятини муҳокама қилмоқда. Аммо гап “одатий” ишлар эмаслиги ҳақида, деб ёзади ОАВ РФ вакилининг журналист Сара Логанга айтган сўзларига таяниб. АҚШга ташрифи доирасида Дмитриев шунингдек Трампнинг махсус вакили Стивен Уиткофф билан “АҚШ ва Россия ўртасидаги муносабатлар муҳокамасини давом эттириш” учун учрашади. Унинг сафари Будапешт саммити бекор қилишдан ва Трампнинг “Лукойл” ҳамда “Роснефть”га нисбатан санкциялар жорий этиш қароридан олдин режалаштирилган эди.

Москва Дмитриевнинг АҚШга ташрифидан аввалоқ Украинада фронт чизиғи бўйича жангларни дарҳол музлатиш ғоясини рад этган эди. РФ ташқи ишлар вазири Сергей Лавровнинг таъкидлашича, Украинада дарҳол оташкесм талаб қилиш “Аляскада эришилган келишувларга зид”. Россия вазирига кўра, бу каби тўхтатиш Украина ҳудудининг катта қисми Кремл “нацистик режим” деб атайдиган сайланган ҳокимият қўлида қолишини англатади.