НАТО бош котиби Путиннинг «пули, аскарлари ва ғоялари тугаётганини» айтди

Владимир Путин фронтдаги минимал муваффақиятлар учун катта нарх тўламоқда ва унинг ресурслари тезда тугаб бормоқда. Бу ҳақда НАТО бош котиби Марк Рютте Лондондаги «кўнгиллилар коалицияси» учрашуви якунлари бўйича ўтказилган матбуот анжуманида маълум қилди.

«Путиннинг тажовузи учун юз минглаб россияликлар ҳалок бўлмоқда. Украина жасорат билан ҳимояланишда давом этмоқда ва бизнинг қўллаб-қувватлашимиз унга ёрдам бермоқда. Ҳақиқат шундаки, Путиннинг пули, аскарлари ва ғоялари тугаб бормоқда», деб таъкидлади Рютте.

Унинг сўзларига кўра, фронтдаги ҳозирги вазият Россия армияси жуда катта йўқотишлар эвазига фақат кичик ютуқларга эришишга қодирлигини тасдиқлайди. Шу билан бирга, НАТО бош котиби АҚШ президенти Доналд Трампнинг ҳозирги фронт чизиғида жанговар ҳаракатларни тўхтатиш зарурлиги ҳақидаги позициясини қўллаб-қувватлади.

«Жанговар ҳаракатларни тўхтатиш ва Украина учун адолатли тинчлик ўрнатишга эришиш учун Россияга босимни кучайтириш вақти келди», деди Рютте.

Шунингдек, у Европа иттифоқчилари ва Канаданинг Украинага қўшимча ҳарбий ёрдам ажратиш қарорини олқишлади.

«Жанг майдонидаги воқеалар ривожи шуни кўрсатадики, бизнинг Украинани қўллаб-қувватлашимиз натижа бермоқда ва биз шу руҳда давом этишимиз керак», деди альянс раҳбари.

Рютте бундай баёнотларни биринчи марта бераётгани йўқ. 16 октябрь куни у НАТО давлатлари Россияга нисбатан иқтисодий ва ҳарбий жиҳатдан жуда катта устунликка эга эканлигини эслатди.

«Биз Россиядан 25 баробар каттамиз. НАТО иқтисодиётининг умумий ҳажми 50 триллион долларни ташкил этади, Россия иқтисодиёти эса атиги икки триллион атрофида, Техас штатидан кўп эмас», деди у ва Москванинг салоҳиятини ортиқча баҳоламасликка чақирди.