Пакяо ва Мейвезер реванш жангини ўтказади

Афсонавий филиппинлик боксчи Мэнни Пакяо ва яна бир бокс юлдузи, америкалик Флойд Мейвезер 2026 йилда реванш жангини ўтказади.

Ring Magazine портали журналисти Майк Коппингернинг маълум қилишича, бокснинг икки афсонаси - Пакяо ва Мейвезер 10 йилдан кейин яна рингга кўтарилади. Уларнинг жанги Netflix’нинг 2026 йилдаги асосий бокс жангларидан бири сифатида кўрилмоқда.

«Аср жанги» деб номланган Мэнни Пакяо ва кенжа Флойд Мейвезер ўртасидаги жанг 2015 йил 2 май куни Лас-Вегасда (Невада, АҚШ) бўлиб ўтди.

Ярим ўрта вазн тоифасида WBC, WBA, WBO ва The Ring камарлари учун ўтказилган ушбу баҳс юлдузлар аншлагини тўплади ва 400 миллион долларга яқин маблағ йиғиб, бокс тарихидаги энг кассабоп жангга айланди.

Жанг 12 раунд давомида нокдаунларсиз ўтди. Ҳакамлар ғалабани бир овоздан Мейвезерга бериб, унинг мағлубиятсиз рекордини таъминлашди. Пакяо кейинчалик елкасидаги жароҳатдан шикоят қилди, бу эса унга энг яхши формада бўлишга имкон бермади, аммо мутахассислар Мейвезернинг тактика ва масофани назорат қилишдаги маҳоратини қайд этди.

Ушбу жангдан сўнг, Мэнни Пакяо яна 8 та жанг ўтказиб, бештасида ғалаба қозонди, иккитасида мағлуб бўлди ва ярим ўрта вазн тоифасида WBC чемпионлик камари учун сўнгги жангини мексикалик боксчи Марио Барриосга қарши ўтказди.

Флойд Мейвезерга келсак, у Пакяога қарши жангдан сўнг яна бир профессионал жанг ўтказди ва унда америкалик Андре Бертони мағлуб этди, шундан сўнг профессионал фаолиятини якунлади.

Бироқ, кейинчалик, 2017 йилда у қайтиб келди ва UFC юлдузи - Конор Макгрегорга қарши кўргазмали жанг ўтказди ва уни 10 раундда техник нокаут билан мағлуб этди. Шу тариқа, у мағлубиятсиз рекордини 50 та жангга етказди.