Ўзбекистон қайси товарларни энг кўп импорт қиляпти?

2026 йилнинг январ—апрел ойларида Ўзбекистоннинг импорт ҳажми 16,4 млрд АҚШ долларини ташкил этди. Импорт таркибида энг катта улушни машиналар ва транспорт асбоб-ускуналари эгаллаган бўлса, озиқ-овқат маҳсулотлари импорти энг юқори ўсиш суръатини қайд этди.

Миллий статистика қўмитаси маълумотларига кўра, йилнинг дастлабки тўрт ойида мамлакатга 5,5 млрд АҚШ долларлик машиналар ва транспорт асбоб-ускуналари импорт қилинган. Бу ўтган йилнинг мос даврига нисбатан 29,1 фоизга кўп.

Импорт таркибида саноат товарлари 2,5 млрд доллар (+17,1 фоиз), кимёвий воситалар ва шунга ўхшаш маҳсулотлар 2,0 млрд доллар (+22,6 фоиз), озиқ-овқат маҳсулотлари ва тирик ҳайвонлар эса 1,9 млрд доллар (+47,2 фоиз) билан кейинги ўринларни эгаллаган.

Шунингдек, хизматлар импорти 1,6 млрд доллар (+15,5 фоиз), минерал ёқилғи, мойлаш материаллари ва шунга ўхшаш маҳсулотлар 1,4 млрд доллар (+25,8 фоиз)ни ташкил этган.

Турли хил тайёр буюмлар импорти 585,7 млн доллар (+34,6 фоиз), ноозиқ-овқат хомашёси (ёқилғидан ташқари) 464,8 млн доллар (+34,5 фоиз), ҳайвон ва ўсимлик мойлари, ёғлар ҳамда мумлар 217,7 млн доллар (+37,3 фоиз), ичимликлар ва тамаки маҳсулотлари эса 100,5 млн доллар (+24,3 фоиз) миқдорида импорт қилинган.

Статистикага кўра, энг юқори ўсиш суръати озиқ-овқат маҳсулотлари ва тирик ҳайвонлар импортида кузатилган бўлиб, ушбу йўналишдаги импорт ҳажми бир йил олдинги даврга нисбатан 47,2 фоизга ошган.