Тергов ва прокурор назорати электрон шаклга ўтказилади

Президентнинг 2025 йил 3 ноябр куни имзоланган ПФ–204-сон фармони билан “Рақамли прокуратура – 2030” стратегияси тасдиқланди. Ҳужжатга кўра, тергов ва прокурор назорати жараёнлари босқичма-босқич электрон шаклга ўтказилади, прокуратура фаолияти тўлиқ рақамли трансформация қилинади.

Фото: iStock

Фармон прокуратура органлари фаолиятида очиқлик, самарадорлик ва жавобгарликни оширишни мақсад қилади. Асосий йўналишлар қуйидагича:

2030 йилгача автоматлаштириш: прокуратура органлари фаолиятининг барча йўналишлари илғор халқаро тажриба асосида рақамлаштирилади;
электрон тергов ва назорат: тергов ҳаракатлари ҳамда прокурор назорати тўлиқ электрон форматга ўтказилади;
Raqamli prokuror АТ-комплекси: ягона платформа орқали маълумот алмашиш, таҳлил ва қарор қабул қилиш тезкорлиги оширилади;
масофавий қонунийлик назорати: давлат органлари қабул қилаётган ҳужжатларнинг Конституция ва қонунларга мувофиқлиги электрон тарзда, реал вақтда мониторинг қилинади;
текширувларни рақамлаштириш: назорат қилувчи органлар тадбирларида қонунларга риоя этилишини кузатиш учун Tekshiruvlarning yagona elektron reyestri'нинг синов версияси ишланади, 2026 йил 1 декабрдан тўлиқ версияси ишга туширилади.

Кутилаётган натижага кўра, янги тизим ҳуқуқбузарликларни илк босқичда аниқлаш, инсон омили таъсирини камайтириш, ортиқча қоғозбозликни қисқартириш ва жамоатчилик учун шаффофликни кучайтиришга хизмат қилади.