Актриса Анжелина Жоли Херсонга ташриф буюрди

Америкалик актриса Анжелина Жоли 5 ноябр куни Херсонга келди. Бу ҳақда Украина Telegram-каналлари, шунингдек давлат телеканали “Суспильне” маҳаллий ҳокимият вакилларига таянган ҳолда хабар қилди.

Жолининг ташриф мақсади ҳозирча аниқ эмас. Бироқ телеканалнинг дастлабки маълумотларига кўра, у тиббий муассасаларга борган, жамоат ташкилотлари вакиллари билан ҳам учрашган. Бундан ташқари, айрим Telegram-каналларида актрисанинг, эҳтимол, паноҳгоҳда олинган сурати ҳам эълон қилинди: унда Жолининг ертўлада ўйин хонасига айлантирилган хонада болалар билан мулоқот қилаётгани кўринади.

Яна бир видеода Херсон ҳарбий маъмурияти раҳбари Ярослав Шанко Анжелина Жолига шаҳарга бағишланган эсдалик медалини топширгани тасвирланган.

Херсонга йўлда актриса Миколайив шаҳридаги ТЦКга ҳам кириб ўтган, чунки унинг қўриқчисини сафарбарликка чақиришни режалаштиришган, деб ёзади “Политика Страны” нашри Одесса шаҳар Telegram-каналларига таяниб. Уларнинг бири Жолининг ТЦК йўлагида тургани кўрсатилган видео ҳам эълон қилган. Жолининг қўриқчисини сафарбарликка чақириш режаси ҳақидаги маълумотни Олий рада депутати Алексей Гончаренко ҳам тасдиқлаган.

ОАВ манбаларига кўра, гап Жолига ҳамроҳлик қилган 1992 йилда туғилган ҳайдовчи ҳақида кетмоқда. У 4 ноябр куни Украина жанубий шаҳри яқинидаги блокпостда шахси аниқлангач, ТЦКга олиб борилган. Шу пайтда унда ҳарбий ҳужжатлари йўқлиги маълум бўлган. ТЦКда унинг захира офицери экани, 2025 йил июн ойида орқа қисм бўлинмаларида хизматга яроқли деб топилгани ва сафарбарликдан озод этилишининг тасдиқланган асослари йўқлиги аниқлангани айтилмоқда. Ҳозир эса у гўёки “сафарбарликка тайёрланаётгани” маълум қилинди.

Шу билан бирга, ТСН телеканали УҚК (ВСУ)да юқори лавозимли манбага таяниб, Жолининг қўриқчиси “мажбурлаб” ушлаб турилмаганини билдирди. “Шахси аниқланди, шундан кейин у тинчлик билан ўз ишлари бўйича кетди. Муаммоли масалалар келиб чиқмади. Ҳаммаси қонун доирасида”, — деган манба. ТСНнинг яна икки манбаси эса мазкур шахснинг сафарбар қилиниши ҳақидаги маълумотни на тасдиқлади, на рад этди. Жолининг ТЦКга кириб боришини улар актрисанинг “ҳожатхона қидиргани” билан изоҳлади.

Жоли Россия бошлаган кенг кўламли урушдан кейин Украинага олдин ҳам келган: 2022 йил апрел ойи охирида у Лвивга ташриф буюрган. Хусусан, у маҳаллий вокзалдаги қочқинларни қабул қилиш марказида ва интернатда бўлган, ҳарбий ҳаракатлардан жабрланган болалар билан учрашган. Маҳаллий аҳоли эса актриса кафега кирган пайтида видео олишга ҳам муваффақ бўлган.

Актриса 2001 йилдан буён БМТнинг Қочқинлар бўйича олий комиссари бошқармасининг яхшилик элчиси бўлса-да, унинг Украинага ўша сафари шахсий ташриф деб хабар қилинган эди.