АҚШ БМТда Сурия президентидан санкцияларни олиб ташлашни режалаштирмоқда

Қўшма Штатлар БМТ Хавфсизлик кенгашига Сурия президенти Аҳмад аш-Шаръадан санкцияларни бекор қилишни назарда тутувчи резолюция лойиҳасини таклиф этди, деб хабар берди 5 ноябр куни Reuters агентлиги ҳужжатга таяниб. Резолюция лойиҳасида, шунингдек, Суриянинг амалдаги ички ишлар вазири Анас Ҳасан Хаттабга нисбатан ҳам санкцияларни олиб ташлаш кўзда тутилган.

Оқ уй матбуот котиби Кэролайн Левиттнинг тасдиқлашича, 10 ноябр куни аш-Шаръа Вашингтонга ташриф буюриб, АҚШ президенти Доналд Трамп билан учрашади. Axios нашри АҚШнинг Сурия бўйича махсус вакили Том Баракка таяниб, ушбу учрашувда Суриянинг вақтинчалик президенти АҚШ бошчилигидаги ИШИДга қарши коалицияга қўшилиш тўғрисидаги келишувни имзолаши кутилаётганини ёзган.

Reuters таъкидлашича, агар БМТ Хавфсизлик кенгаши Трамп билан режалаштирилган учрашувдан олдин аш-Шаръадан санкцияларни олиб ташлаш учун овоз бермаса ҳам, унинг Вашингтонга келишига тўсиқ бўлмайди. Чунки БМТ ХКнинг санкциялар қўмитаси илгари Суриянинг вақтинчалик ҳукумати раҳбарига саёҳат рухсатномалари берган. Бундан ташқари, жорий йил сентябр ойида сўнгги 25 йилда биринчи марта Сурия ТИВ раҳбари Ҳасан аш-Шибаний АҚШга ташриф буюрган.

Қўшма Штатлар сўнгги бир неча ой давомида БМТ Хавфсизлик кенгаши аъзоларини Сурияга нисбатан санкцияларни юмшатишга чақириб келмоқда. Ҳозирча АҚШнинг янги резолюцияси қачон умумий овоз беришга қўйилиши ноаниқ. У қабул қилиниши учун камида тўққизта қўллаб-қувватловчи овоз ва Россия, Хитой, АҚШ, Франция ёки Буюк Британия тарафидан ветонинг йўқлиги талаб этилади. Трамп эса май ойида Вашингтоннинг Сурияга нисбатан сиёсатини сезиларли ўзгартириб, мамлакатдан АҚШ санкцияларини олиб ташлашини эълон қилган эди.

15 октябр куни Аҳмад аш-Шаръа Москвага ташрифи доирасида РФ президенти Владимир Путинга Дамашқдаги янги ҳокимият Россия ва Сурия ўртасида илгари тузилган барча келишувларга амал қилишини маълум қилди. Путин ўз навбатида Москва Дамашқ билан муносабатларни қайта тиклашга тайёр эканини таъкидлади.

Аш-Шаръа 2024 йил охирида Москванинг кўп йиллик иттифоқдоши Башар Асадни ағдаргани билан танилган. Унинг жанговар номи - Абу Муҳаммад ал-Жўланий.

Россия кўп йиллар давомида Асадни Суриядаги исёнчиларга қарши ҳарбий йўл билан қўллаб-қувватлаб келган эди, аммо аш-Шаръа раҳбарлигидаги кучлар 2024 йил декабрида ҳокимиятга келди. Асад ағдарилгандан кейин РФ унга ва оиласига сиёсий бошпана берди. Россия ОАВ хабар қилишича, Асадлар оиласи ҳозир Москвада яшамоқда.