Трамп Сурияга инвестициялар йўлини очиш ниятида

АҚШ президенти Доналд Трамп Сурия муваққат президенти Аҳмад аш-Шаръага йўллаган мактубида мамлакатни терроризмни қўллаб-қувватловчи давлатлар рўйхатидан чиқариш ниятида эканини маълум қилди. Бу ҳақда Reuters агентлиги хабар берди.

Фото: AP

Маълум қилинишича, мактубда Трамп Сурияга америкалик инвесторларни жалб қилиш ва мамлакат иқтисодиётини тиклашга кўмаклашиш режалари ҳақида ҳам тўхталган.

«Бизда Сурияга сармоя киритишга тайёр бўлган америкалик компаниялар бор. Улар мамлакатингизни ҳар қачонгидан ҳам фаровон ва ривожланган давлатга айлантиришга ёрдам беришга тайёр», — дейилади АҚШ президентининг мурожаатида.

Шунингдек, НАТО саммитининг якуний кунида Анқара шаҳрида Доналд Трамп ва Сурия муваққат президенти Аҳмад аш-Шаръанинг шахсий учрашуви бўлиб ўтди. Унда икки давлат ўртасидаги муносабатларни янада ривожлантириш, иқтисодий ҳамкорлик ва хавфсизлик масалалари муҳокама қилинган.

Бундан аввал Трамп Сурияга нисбатан жорий этилган АҚШ санкцияларини бекор қилиш тўғрисидаги фармонни имзолаган эди. Шу билан бирга, у давлат котиби Марко Рубиога Сурияни терроризм ҳомийси давлатлар рўйхатидан чиқариш масаласини кўриб чиқиш бўйича топшириқ берган.

Мазкур рўйхатда бўлиш мамлакат учун қатор жиддий чекловларни англатади. Жумладан, АҚШнинг ташқи ёрдами чекланади, қурол-яроғ экспорт қилиш тақиқланади ҳамда халқаро молиявий операцияларга оид бир қатор тўсиқлар сақланиб қолади. Шу сабабли Суриянинг ушбу рўйхатдан чиқарилиши мамлакат иқтисодиётига хорижий инвестициялар оқимини ошириши мумкин.

Хусусан, Саудия Арабистонининг бир нечта йирик компаниялари аллақачон Сурияни урушдан кейин қайта тиклаш лойиҳаларига сармоя киритишга тайёрлигини билдирган. Суриянинг янги раҳбарияти эса АҚШ қарорлари мамлакатнинг жаҳон иқтисодиётига қайта интеграция қилиниши учун муҳим қадам бўлишини таъкидлаб келмоқда.

Трамп ва аш-Шаръанинг аввалги учрашуви

Доналд Трамп Сурияга қарши санкцияларни бекор қилиш ниятини илк бор 2025 йил май ойида маълум қилган эди. Орадан кўп ўтмай, Ар-Риёд шаҳрида у Сурия муваққат президенти Аҳмад аш-Шаръа билан учрашди. Бу АҚШ ва Сурия раҳбарларининг сўнгги 25 йил ичидаги биринчи расмий учрашуви сифатида тарихга кирди.

Аввалроқ The Times нашри Сурия раҳбари АҚШдан санкцияларни бекор қилиш эвазига америкалик компанияларга мамлакат табиий ресурсларидан фойдаланиш имкониятини таклиф қилганини ёзган эди.

АҚШ қўшинлари Сурияни тарк этган

2026 йил апрел ойида Сурия Ташқи ишлар вазирлиги мамлакат ҳудудида жойлашган АҚШ ҳарбий кучлари тўлиқ чиқиб кетганини маълум қилди. Вазирлик баёнотида Америка ҳарбий объектларининг Сурия ҳукуматига топширилиши юқори даражадаги ҳамкорлик асосида амалга оширилгани қайд этилган.

АҚШ Марказий қўмондонлиги (CENTCOM) ҳам бу маълумотни тасдиқлади. Шу билан бирга, Вашингтон минтақада ИШИД террорчилик гуруҳига қарши ҳамкор кучлар иштирокидаги операцияларни қўллаб-қувватлашда давом этишини маълум қилди.