Навоий вилоятида ноқонуний мармар қазиб олиш: зарар 339 млн сўмга баҳоланмоқда

Бош прокуратура ҳузуридаги Департаментнинг Ғозғон шаҳри бўлими текширувида “Б.Ч.” МЧЖ масъул шахслари томонидан мармар конидан қонунга хилоф равишда 862,11 м³ мармар қазиб олингани аниқланди. Дастлабки ҳисоб-китобларга кўра, давлат ва жамият манфаатларига етказилган зарар 339 млн сўмга баҳоланмоқда.

Фото: Бош прокуратура ҳузуридаги департамент

Текширув материалларига кўра, корхона масъуллари белгиланган тартиб-қоидаларга риоя қилмасдан хом ашё қазиб олган. Аниқланган ҳолат юзасидан Ўзбекистон Республикаси Жиноят кодексининг 229-моддаси (ўзбошимчалик) билан жиноят иши қўзғатилди.

Ҳозирда тергов ҳаракатлари ўтказилмоқда, етказилган зарарни қоплаш, шунингдек қонунбузарликка алоқадор шахсларнинг жавобгарлигини белгилаш бўйича процессуал чоралар кўрилмоқда.