Gunvor “Лукойл”нинг хорижий активларини сотиб олишдан воз кечди

Gunvor (Кипрда рўйхатдан ўтган) халқаро нефт трейдинги компанияси Россиянинг энг йирик хусусий нефт-газ компанияси “Лукойл”нинг хорижий активларини сотиб олиш бўйича таклифини қайтариб олганини эълон қилди. Баёнот компаниянинг X ижтимоий тармоғидаги саҳифасида 6 ноябр куни эълон қилинди.

Gunvor вакиллари бу қарор ҳақида АҚШ Молия вазирлиги Gunvor’нинг Россия билан боғлиқлиги ҳақида баёнот бериб, компанияга Украинадаги уруш тугамагунча бизнес юритиш учун лицензия бермаслигини билдирганидан тахминан бир соат ўтиб маълум қилди.

“Президент Трамп уруш дарҳол тўхташи кераклигини очиқ баён қилди. Россия қотилликларни давом эттирар экан, Кремл қўғирчоғи — Gunvor — ҳеч қачон фаолият юритиш ва фойда олиш учун лицензия олмайди”, — дея қайд этилди вазирликнинг X’даги баёнотида.

Компания вакиллари эса АҚШ Молия вазирлиги баёнотини “бутунлай дезинформация ва ёлғон” деб атади, чунки “Gunvor ҳар доим ўз эгалари ва фаолияти ҳақида очиқ-ошкор маълумот бериб келган, ўн йилдан ортиқ вақтдан бери Россиядан фаол узоқлашиб, санкцияларга мувофиқ савдони тўхтатган, Россиядаги активларни сотган ва Украинадаги урушни омма олдида қоралаб келяпти”.

“Биз бу очиқдан очиқ нотўғри тушунчани тузатиш имкониятидан мамнунмиз. Шу билан бирга, Gunvor ‘Лукойл’нинг хорижий активларини сотиб олиш бўйича ўз таклифини қайтариб олишини эълон қилади”, — деб қўшимча қилди компания.

“Лукойл” (АҚШ ва Буюк Британия санкциялари остида) компанияси вакиллари 30 октябр куни хорижий бизнесни Gunvor’га сотиш бўйича келишув юзасидан маълумот берган эди. Ўшандаёқ рус томони бошқа эҳтимолий харидорлар билан музокара қилмаслик мажбуриятини олганди.

Бироқ эҳтимолий битим Россия компаниясига нисбатан жорий этилган чекловларни айланиб ўтиш уриниши деб талқин қилиниши мумкин эди. Чунки Gunvor 2000 йилда россиялик Геннадий Тимченко ва швед тадбиркори Турбёрн Тёрнквист томонидан ташкил этилган. 2014 йилда, Қрим қўшиб олиниши учун халқаро санкциялар кучга киришидан олдин, Тимченко ўз улушини ҳамкорига сотган. Шундан сўнг Gunvor Россиядаги активларини сотиб юборади.

АҚШ Молия вазирлигининг Ташқи активлар назорати бошқармаси (OFAC) 22 октябр куни “Россиянинг Украинадаги урушни тинч йўл билан тугатиш жараёнига жиддий қизиқиш билдирмаётгани” муносабати билан қўшимча санкциялар жорий этди. Чекловлар доирасига “Лукойл” ва “Роснефть”гина эмас, балки уларнинг 34 та шуъба компаниялари ҳам тушди. Шунингдек, “Лукойл” ва “Роснефть” улуши 50 фоиз ва ундан ортиқ бўлган барча компаниялар ҳам блокланади.

Бир ҳафта олдин Буюк Британия ҳам “Лукойл” ва “Роснефть”га нисбатан санкциялар жорий этган эди. Бу жазо чоралари активларни музлатишни, шунингдек траст хизматлари ва транспорт операцияларига чеклов қўйишни назарда тутади. Лондонда таъкидланишича, “Роснефть” ва “Лукойл” Россия ҳукумати учун “муҳим аҳамиятга эга” соҳа — энергетикада фаолият кўрсатади.