Италияда опера хонандаси Абдураззоқовнинг чиқиши бекор қилинди

Россиялик опера хонандаси Элдор Абдураззоқовнинг Италиянинг Верона шаҳридаги Филармония театрида 2026 йил январ ойига режалаштирилган Волфганг Моцартнинг “Дон Жуан” операсидаги иштироки бекор қилинди. Бу ҳақда 6 ноябр куни театр сайтида хабар берилди.

“Элдор Абдураззоқов 2026 йил 18–25 январ кунлари Филармония театрида саҳналаштириладиган ‘Дон Жуан’ операсида иштирок этмайди”, — дейилган эълонда. Россиялик хонанданинг чиқиши нега бекор қилингани сабаблари кўрсатилмаган. Январ ойида ушбу операнинг тўрт марта қўйилиши режалаштирилган эди. Абдураззоқов бош рол — Дон Жуанни ижро этиши керак бўлган. Уни ким алмаштириши ҳозирча маълум эмас.

Россиялик санъаткорнинг чиқиши бекор қилинишига Европарламент вице-президенти Пина Пичерно изоҳ берди. “Биз яна бир бор Путин ва Кремл пропагандаси устидан ғалаба қозондик”, — деб ёзди у X ижтимоий тармоғидаги саҳифасида. Шунингдек, у Коррупцияга қарши кураш фонди (ФБК), Юлия Навалная ва “чора кўрган барча”га миннатдорлик билдирди.

Россиялик хонанданинг келишига Liberi Oltre le Illusioni уюшмаси қарши чиққан. Улар Абдураззоқовнинг 2024 йилги президентлик сайловларида Владимир Путиннинг ишончли шахслари рўйхатида бўлгани ва шу йилнинг ўзида Президент ҳузуридаги маданият ва санъат бўйича кенгаш аъзоси сифатида фаолият юритганини келтирган.

Абдураззоқовга қарши кампанияга ФБК ҳам қўшилди. Ташкилотнинг таъкидлашича, россиялик хонанда Европада “ҳашаматли виллага” эга. ФБК вакили Европани “Кремл урушига очиқча жамоатчиликда тарафдорлик қиладиган” шахслар билан ҳамкорлик қилмасликка чақирарди.

Бу — 2022 йил февралда Украинада кенг кўламли уруш бошланганидан кейин Абдураззоқовнинг хорижда бекор қилинган биринчи чиқиши эмас. 2023 йилда Ню-Йоркдаги Метрополитен-Опера ва Карнеги-ҳолл, Миландаги Ла Скала, Бостон симфоник оркестри ва Мюнхен опера фестивали у билан ишлашдан бош тортган. 2024 йилда эса Неаполдаги Сан-Карло опера театри ҳам 2025 йилга режалаштирилган ҳамкорликдан воз кечган.

Июл ойи охирида, тадбирга бир ҳафта қолганда, кенг жамоатчилик резонанси ортидан россиялик дирижёр Валерий Гергиев иштирокидаги концерт бекор қилинди. У Италиянинг Казерта шаҳридаги Un’Estate da Re фестивали доирасида чиқиш қилиши керак эди. Агар концерт ўтганида, у Гергиев учун 2022 йил 23 февралда Ла Скалада “Пиковая дама” операсига дирижёрлик қилганидан кейинги биринчи чиқиш бўлар эди.