BRT йўлаги: 81-сонли автобус ҳаракати қайта тикланди

2025 йил 9 ноябрдан бошлаб 81-сонли автобус йўналиши Шота Руставели кўчасидаги марказий автобус йўлаги (BRT) орқали ҳаракатни қайта тиклади. BRT бўйлаб ҳаракатланаётган автобусларга устуворлик берилиши шарт.

Фото: Kun.uz

Тошкент шаҳар транспорт ва йўл-транспорт инфратузилмасини ривожлантириш бош бошқармаси маълум қилишича, Шота Руставели кўчасида жойлашган BRT йўлаги орқали қатнов 81-сонли йўналиш учун қайта йўлга қўйилди. Ушбу тартиб барча йўл ҳаракати иштирокчиларидан ҳамкорлик, эҳтиёткорлик ва маданиятли ҳаракатни талаб қилади.

BRT — пойтахт транспорт тизимини замонавийлаштириш, автобуслар тезлиги ва жадвал интизомини яхшилашга қаратилган муҳим инфратузилма ечимидир. Автобуслар учун ажратилган йўлакда устуворликни таъминлаш йўловчи ташиш самарадорлигини оширади.