Тошкент халқаро аэропорти учиб келиш залида E-Gate тизими ишга туширилди

Бунда йўловчилар шунчаки биометрик паспортини маълумот текширувчи сканерга қўяди ва идентификация қилиш (Face ID) процедурасидан ўтади.

Фото: Uzbekistan Airports

Тошкент халқаро аэропортининг учиб келиш залида автоматлаштирилган E-Gate паспорт назорати тизими ишга туширилди.

Янги ўтиш жойлари Ўзбекистон фуқаролари учун мўлжалланган саккизта электрон йўлак билан жиҳозланган.

Йўловчилар шунчаки биометрик паспортини маълумот текширувчи сканерга қўяди ва идентификация қилиш (Face ID) процедурасидан ўтади. Шахси тасдиқлангандан сўнг, турникет автоматик равишда очилади. Бутун жараён тахминан 15-20 сония давом этади.

E-Gate тизими биринчи марта 2023 йилда Тошкент аэропортида халқаро терминалнинг жўнаш залида жорий этилган эди. Ушбу янги тизим ёрдамида пойтахт аэропортидаги автоматлаштирилган йўлакларнинг умумий сони 20 тага етди.

Таъкидланишича, E-Gate технологиясининг жорий этилиши паспорт назорати вақтини сезиларли даражада қисқартиради, назорат пунктларининг ўтказувчанлигини оширади ва йўловчилар учун қўшимча қулайлик яратади.

Тайёрлаган: Сардор Юсупов

#Тошкент #аэропорт #E-Gate