Роналду қизил олди, Франция йўлланмани ҳал қилди. Кун ўйинлари

Ирландия курашга қайтди

Ирландия – Португалия 2:0

Голлар: Пэрротт, 17 (1:0). Пэрротт, 45 (2:0)
Ирландия: Келлеҳер, О`Ши, О`Брайен, Коллинз, Скейлс (Данн, 86), Коулман, Тэйлор (Ковентри, 68), Каллен, Эйзас (Эбоселе, 79), Пэрротт (Ида, 68), Огбене (Жонстон, 86)
Португалия: Кошта, Рубен Диаш, Гонсалу Инасиу (Семеду, 46), Далот, Жоау Канселу (Вейга, 46), Витиня, Рубен Невеш, Жоау Невеш (Рамуш, 78), Жоау Феликс (Тринкао, 63), Бернарду Силва (Леау, 63), Криштиану Роналду
Огоҳлантиришлар: Эйзас, 38. Тэйлор, 45. Скейлс, 86 – Жоау Канселу, 19. Рубен Диаш, 45
Четлатиш: Криштиану Роналду, 59

Португалия миллий жамоаси муддатидан олдин 2026 йилги жаҳон чемпионатига чиқиши мумкин эди. Бунинг учун Роберто Мартинес шогирдлари сафарда Ирландияни мағлуб этиши етарли бўларди. Аммо мезбонлар ҳам турнирга чиқиш учун кураш олиб бормоқда. Уларга очколар Португалияга қараганда муҳимроқ.

Дублиндаги ўйин бошида Португалия тўпга эгалик қилди ва ўзини мезбонларга хос тарзда тутди, аммо вақт ўтган сайин ирландлар хавфли қарши ҳужумлар уюштира бошлади, 17-дақиқада эса Диогу Коштанинг хатоси туфайли белгиланган бурчак зарбасидан ҳисобни очишди. Олис устун олдида турган Скейлс тўпни боши билан дарвозабон ҳудудига ташлаб берди, у ерда эса Пэрротт барчадан илдамлик қилди. Умуман олганда, меҳмонлар босим қилди, мезбонлар гол уришди. Биринчи бўлим охирида томонлар ўзаро голли вазиятлар алмашишди (Огбененинг зарбаси устунга тегди, Келлеҳер эса Витинянинг зарбасидан кейин қаҳрамонлик кўрсатди), кейин эса Пэрротт дубл расмийлаштирди. АЗ Алкмар клуби форварди яқин бурчакни аниқ нишонга олди.

Танаффусдан кейин Португалия камбэк қилиш учун олдинга ташланди. Аммо мезбонлар тўлиқ ҳимояланиб, рақибнинг юлдузларига вазият яратишга имкон қолдирмади. 60-дақиқада эса фавқулодда ҳодиса рўй берди – Криштиану Роналду тўғридан тўғри қизил карточка олди. У ортидаги ирландлар ҳимоячиси Дару О’Шига тирсаги билан зарба берди: аввалига ҳакам Гленн Нюберг эпизодни кўрмай қолганди, аммо VAR аралашуви билан қарорини ўзгартирди. Бу Криштиану учун миллий жамоадаги илк четлатиш бўлди.

Натижада ўйиннинг қолган қисмида ҳисоб ўзгармай қолди, ирландларга қарши қаторасига иккинчи ўйинда очколардан маҳрум бўлган (Лиссабондаги ўйинда Роналду пеналтини уролмаганди) Мартинес шогирдлари энди фақат сўнгги турда, ҳеч қандай мотивацияси йўқ бўлган арманларга қарши ўйинда йўлланмани расмийлаштириши мумкин. Ирландия эса ўтиш ўйинларида қатнашиши учун сафарда Венгрияни мағлуб этиши керак бўлади.

Арманистон – Венгрия 0:1
Гол: Варга, 33 (0:1)
Арманистон: Авагян, С. Мурадян, Мкртчан, Тикнизян, Пилоян, К. Мурадян (Агасарян, 90), Сперцян, Оганесян (Налбандян, 77), Шагоян (Григорян, 69), Севикян (Элоян, 77), Ранос (Серобян, 76)
Венгрия: Дибус, Салаи, Орбан, Керкез (Над, 86), Него, Стайлс (Виталиш, 71), Собослаи, Шефер, Шоллои (Тот, 71), Болла (Лукач, 61), Варга
Огоҳлантиришлар: Ранос, 52 – Шефер, 83

Венгрия миллий жамоаси сафарда Арманистон устидан минимал ҳисобда ғалаба қозонди. Ўйиндаги ягона гол 33-дақиқада Доминик Собослаининг узатмаси орқали ҳужумчи Барнабаш Варга томонидан урилди. Арманлар эса дарвоза соҳаси томон бирор марта тўғри зарба беролмади. Якунда мағлубиятга учраган мезбонлар Шимолий Америкада бўлиб ўтадиган жаҳон чемпионати йўлланмасидан буткул умид узди. Венгрлар эса Португалия Ирландияга ютқазгани туфайли ҳали ҳам иккинчи ўринни кафолатлай олмади. 6-турда барчаси ирландлар билан ўзаро ўйинда ҳал бўлади. Аммо Венгрияда устунлик бор: Марко Росси жамоасини дуранг ҳам қониқтиради.

16 ноябр. Венгрия – Ирландия, Португалия – Арманистон.

Франция қаторасига олтинчи йирик турнирга йўлланма олди

Озарбойжон – Исландия 0:2
Голлар: А. Гудмундссон, 20 (0:1). Ингасон, 39 (0:2)
Озарбойжон: А. Байрамов, Мустафозода, Кривоцюк, Бадалов, Махмудов (Д. Нуриев, 60), Хайбулаев (А. Нуриев, 84), Аббасов, Гусейнов, Т. Байрамов (Аҳмадзода, 60), Алиев (Абдуллазода, 72), Охунзода (Дадашов, 72)
Исландия: Оулафссон, Гретарссон, Ингасон, Эллертссон, Палссон, Йоханнессон (Тоурдарсон, 90), Ҳаралдссон, Й. Гудмундссон (Торстейнссон, 68), Ҳлинссон (Видлюмссон, 68), А. Гудмундссон (Тордарсон, 90+1), А. Гудйонсен (Д. Гудйонсен, 68)
Огоҳлантиришлар: Хайбулаев, 31. Мустафозода, 62. Аҳмадзода, 83. Кривоцюк, 85 – Палссон, 49. Видлюмссон, 69

Озарбойжон Фернанду Сантушни ишдан бўшатгач, ёшлар жамоасидан жалб этилган Ойхон Аббосов билан украинларга қарши икки ўйинда рақибни очколардан маҳрум этди (1:1, 1:2). Аммо ўтиш ўйинларига бошқа бир даъвогар билан ўйинларда бунинг уддасидан чиқиб бўлмади. Исландия Бокудаги ўйиннинг биринчи бўлими ўрталарида мезбонлар сунъий офсайд ҳосил қилишда йўл қўйган хатодан фойдаланди ва Гудмундссон Йоханессоннинг пасидан кейин дарвозабон билан яккама-якка вазиятга чиқиб борди. Бўлим охирларида эса ҳимоячи Ингасон стандарт вазиятда Гудмундссон ошириб берган тўпни дарвозага йўллаб, ҳисобдаги устунликни оширди. Озарбойжон бир ярим йилдан буён ғалабасиз серия қайд этмоқда, исландияликлар эса минимум вазифани бажариб, гуруҳ жадвалида украинларни қувиб ўтди ва Париждан янгилик кута бошлади.

Франция – Украина 4:0
Голлар: Мбаппе, 55 – пеналти (1:0). Олисе, 76 (2:0). Мбаппе, 83 (3:0). Экитике, 88 (4:0)
Франция: Менян, Упамекано, Салиба, Дин, Кунде (Гюсто, 89), Коне (Заир-Эмери, 80), Канте, Шерки (Аклиуш, 68), Барколя (Экитике, 67), Олисе (Нкунку, 89), Мбаппе
Украина: Трубин, Сваток, Забарний, Михавко (Циганков, 75), Михайличенко, Караваев, Ярмолюк (Волошин, 85), Назарина, Очеретко (Шапаренко, 64), Яремчук (Зубков, 75), Гуцуляк (Ванат, 64)
Огоҳлантиришлар: Коне, 31 – Михавко, 54. Ярмолюк, 74

Париждаги ўйинда эса Франция жаҳон чемпионати йўлланмасини ҳал қилди. Французлар ўз майдонида Украинани йирик ҳисобда тор-мор этишди. Мезбонлар биринчи бўлим давомида зарбалар бериш бўйича 8:0 ҳисобида устунликка эришди, аммо тўп дарвозага киришни истамади. Фақат иккинчи бўлим бошида Килиан Мбаппе Майкл Олисе томонидан ишланган пеналтини аниқ ижро этиб, ҳисобни очди.

76-дақиқада эса «Бавария» вингерининг ўзи прессинг орқали бошланган тезкор ҳужумни гол билан якунлади. Кўп ўтмай Мбаппе дублни расмийлаштирди. Бу 26 ёшли футболчининг фаолиятидаги 400-гол бўлди. Якуний ҳисоб 88-дақиқада Уго Экитике томонидан ўрнатилди. 4:0 – французлар муддатидан олдин йўлланмани ҳал қилди. Украина энди ўтиш ўйинларида қатнашиш учун Исландияни мағлуб этиши керак бўлади, сўнгги турда исландларни иккинчи ўринни ўзида сақлаб қолиш учун дуранг ҳисоб ҳам қониқтиради.

16 ноябр. Озарбойжон – Франция, Украина — Исландия

Ҳоланд рекордга қараб кетмоқда

Норвегия – Эстония 4:1
Голлар: Серлот, 50 (1:0). Серлот, 52 (2:0). Ҳоланд, 56 (3:0). Ҳоланд, 62 (4:0). Саарма, 64 (4:1)
Норвегия: Нюланн, Айер, Ҳеггем, Волфе (Беркан, 86), Рюэрсон, Берг (Торсби, 74), Берге, Нуса (Деннум, 86), Бобб (Шелдеруп, 69), Серлот (Торстведт, 74), Ҳоланд
Эстония: Хейн, Кууск, Метс, Шеннинг-Ларсен, Пеэтсон, Соометс (Веткал, 75), Палуметс (Кристал, 83), Шейн (Поом, 83), Синявский, Саарма (Миллер, 69), Саппинен (Паалберг, 83)

Норвегия миллий жамоаси навбатдаги бор йирик ғалабага эришди. Бу сафар жабрланувчи Эстония бўлди. Норвеглар иккинчи бўлимнинг 14 дақиқаси ичида тўрт бор дарвозани ишғол этишди: Эрлинг Ҳоланд ва Александр Сёрлот дублга эришди. Криштиану Роналдунинг миллий жамоа учун голлар бўйича рекорди хавф остида. Ҳоландда аллақачон Норвегия сафидаги 47 ўйинда 53 гол уришга улгурди. Қолаверса, у бу сафарги саралаш турнирининг ўзида 14 гол билан яққол пешқадамлик қилмоқда.

Бу ғалабадан кейин скандинавлар амалда ЖЧ-2026 йўлланмасини ҳал қилишди. Сўнгги тур олдидан Стол Солбаккен шогирдлари 21 очко тўплаган ва Италиядан уч очкога олдинда. Аммо Норвегия тўплар нисбати бўйича катта фарқ ҳосил қилган («+12»га қарши «+29»), натижада сўнгги турда италянларга мағлуб бўлиш ҳам амалда ҳеч нарсани ўзгартирмайди, вазият ўзгариши учун Норвегия якшанба куни Италияда 9 та жавобсиз гол ўтказиши керак бўлади. Шундай экан, Норвегия 28 йил ичидаги илк жаҳон чемпионати йўлланмасини байрам қилишни бошлади.

Молдова – Италия 0:2
Голлар: Манчини, 88 (0:1). Эспозито, 90+2 (0:2)
Молдова: Кожухар, Крэчун, Думбрэвану, Штефан, Ионицэ, Перциун (Богачук, 61), Рацэ (Бодиштяну, 74), Рябчук (Битца, 55), Ревенко, Николаэску (Фратя, 74), Постолаки (Дамашкан, 55)
Италия: Викарио, Буонджорно, Манчини, Камбясо (Димарко, 74), Белланова, Кристанте, Распадори (Ретеги, 65), Тонали, Дзаккани (Фраттези, 82), Орсолини (Политано, 74), Скамакка (Эспозито, 65)
Огоҳлантиришлар: Думбрэвану, 2. Ревенко, 28. Штефан, 90

Италия ҳам Кишинёвдаги ўйинда осон ғалабага эришиши кутилганди, аммо меҳмонлар узоқ вақтгача кўплаб вазиятлардан (2,58 xG) гол ура олмади, мезбонлар дарвозабони Кожухар мунтазам равишда сейв амалга оширди. Ва фақат 88-дақиқага бориб девор бузиб ўтилди: ҳимоячи Жанлука Манчини рақиб жарима майдонида барчадан баланд сакраб, боши билан дарвозани ишғол этди. Қўшимча дақиқаларда эса Франческо Эспозито ҳам қанотдан оширилган узатмани бош билан голга айлантирди.

2:0 – Италия жаҳон чемпионатига тўғридан тўғри йўлланма учун назарий имконият сақлаб қолмоқда. Амалда эса бу иложсиз иш. Якунда биринчи ўринга чиқиш учун италянлар Норвегияни тўққиз гол фарқи билан мағлуб этиши керак бўлади. Шундай экан, Норвегия билан ўйинда италянлар ўтиш ўйинларига тайёргарлик кўришни бошласа ҳам бўлади.

16 ноябр. Исроил – Молдова, Италия – Норвегия.

Англияга ҳеч ким гол уролмаяпти

Англия – Сербия 2:0
Голлар: Сака, 28 (1:0). Эзе, 90 (2:0)
Англия: Пикфорд, Конса, Стоунс, О`Райли, Жеймс, Райс (Ҳендерсон, 65), Андерсон (Уортон, 85), Роджерс (Беллингҳэм, 65), Рэшфорд (Фоден, 65), Сака, Кейн (Эзе, 65)
Сербия: Райкович, Павлович, Миленкович, Терзич (Груич, 76), Мимович, Гудел (Самарджич, 69), Лукич (Радонич, 76), Илич (Станкович, 39), Костич, Живкович (Йович, 76), Влаҳович
Огоҳлантириш: Костич, 85

Муддатидан олдин йўлланмани ҳал қилиб бўлган Англия ЖЧ-2026 саралаши доирасидаги еттинчи ўйинда ҳам ғалабага эришди. Томас Тухел жамоаси Сербияни иккинчи ўйинда ҳам мағлуб этди. 28-дақиқада Букайо Сака стандарт вазият давомида амалга оширилган ҳужумни гол билан якунлади. Шундан кейин инглизлар ўйинни назорат қилди ва катта куч сарфламасдан ҳимояда ўйнади. Сербия деярли вазиятларга эга бўлмади, ўйин охирида эса Пикфорд Костичда юзага келган ягона вазиятни ҳам бартараф этди. Қўшимча дақиқаларда Эберечи Эзе якуний ҳисобни ўрнатди – 2:0. Инглизлар саралашда етти ўйинда ҳам дарвозаси дахлсизлигини сақлаб қолди (20:0). Серблар эса бу мағлубиятдан кейин иккинчи ўриндан умид узишди, аммо уларда Миллатлар лигаси орқали ўтиш ўйинларига ўтиш имконияти бўлади, бунинг учун жаҳон чемпионатига йўлланма ололмаган жамоалар орасида кучли тўртликка кириш талаб этилади.

Андорра – Албания 0:1
Гол: Аслани, 67 (0:1)
Андорра: Руис, Лловера, Оливера, Сан Николас (Ремолинс, 86), Борра, Бабот (Феррейра, 86), Искиэрдо (Тейшейра, 69), Сервос, Родриго, Лопес (Морено, 86), Росас (Фернандес, 69)
Албания: Стракоша, Айети, Жимсити, Митай, Ҳюсай, Аслани, Лячи (Байрами, 60), Шеху, Хўжа, Бройя (Узуни, 60), Манай (Туци, 77)
Огоҳлантиришлар: Искиэрдо, 39. Родриго, 75. Лопес, 81 – Айети, 56. Байрами, 83

Албания миллий жамоаси ҳали бирор марта жаҳон чемпионатига чиқмаган. Аммо энди бунинг учун икки ўйинда ғалаба қозониш етарли бўлади. Албанлар бу турда сафарда Андоррани мағлуб этган ҳолда ўтиш ўйинларидаги иштирокини таъминлади. Силвинио шогирдларига ғалабани «Торино» яримҳимоячиси Кристян Аслани 67-дақиқада урилган гол билан кафолатлади. Албания энди сўнгги тур олдидан учинчи ўриндаги Сербияни тўрт очколик фарқ билан ортда қолдирмоқда ва сўнгги турда Англияга қарши ўйин қуруқ расмиятчиликка айланади.

16 ноябр. Албания – Англия, Сербия – Латвия.