«Реал» аутсайдерга ютқазди, «Барса» чемпионликка яқинлашди

«Реал» амалда чемпионлик курашидан чиқди

«Малйорка» – «Реал» 2:1
Голлар: Морланес, 41 (1:0). Эдер Милитао, 88 (1:1). Муричи, 90+1 (2:1)
«Малйорка»: Роман, Маскарел, Валент, Мохика, Маффео, Дардер, Морланес (Лопес, 70), Кошта (Вирхили, 70), Пабло Торре (Жозеф, 70), Мурики, Лувумбу (Санчес, 81)
«Реал»: Лунин, Рюдигер, Ҳаусен (Эдер Милитау, 59), Каррерас, Александр-Арнолд, Камавинга (Беллингҳэм, 59), Тшуамени, Арда Гулер (Питарч, 72), Мануэл Анҳел (Винисиус Жуниор, 59), Мбаппе, Диас (Мастантуоно, 76)
Огоҳлантиришлар: Роман, 66. Валент, 84. Лувумбу, 90. Маффео, 90 – Ҳаусен, 47. Мастантуоно, 90

«Реал» чемпионлик пойгасининг ҳал қилувчи палласида қоқилди. 30-турда мадридликлар клуби чемпионатнинг 18-ўриндаги жамоаси бўлиб турган «Малйорка» майдонида сенсацион тарзда мағлубиятга учради (1:2).

Ўтган турда қизил олгани учун Валверде дисквалификацияга учраганди, натижада «Кастиля» жамоаси сардори Мануэл Моран бошланғич таркибда дебют қилиш имконига эга бўлди. Жамоа етакчиларидан бири Килиан Мбаппе 21 февралдан буён илк бор ла лига учрашувида илк дақиқалардан ҳаракат қилди. Шунингдек, Каррерас ва Камавинга сафга қайтганди. Қолаверса, Милитао, Асенсио ва Беллингҳэм захира ўриндиғидан жой олишди.

Аммо жароҳатдан энди қайтган футболчилар ҳали формасини тиклашга улгурмагани маълум бўлди. Мбаппе биринчи бўлимда икки бор дарвозабон билан яккама-якка вазиятдан фойдалана олмади. Мезбонлар дарвозабони Арданинг ҳам хавфли зарбасини бартараф этди.

41-дақиқада эса ҳисоб очилди. Эдуардо Камавинга мезбонлар яримҳимоячиси Ману Морланесни қўриқламади ва у Лунинни осонлик билан доғда қолдирди.

Мбаппе вазиятни ўнглашга ҳаракат қилди, аммо Роман унинг навбатдаги хавфли зарбасини ҳам қайтарди. 60-дақиқада Арбелоа Винисиус, Беллингҳэм ва Милитаони, бироз ўтиб Питарч ва Мастантуонони майдонга ташлади.

Таркиб кучайтирилганига қарамай, ўйин охиригача яққол голли вазиятлар яратилмади. Фақат 88-дақиқада стандарт вазият иш берди: Трент тўпни бурчакдан оширди, Милитао бош билан аниқ зарба берди.

Аммо мадридликлар клуби бу оқшом бир очко ҳам қўлга кирита олмади. Қўшимча дақиқалар бошланганида Трент Жозефни ўтказиб юборди, у эса жарима майдони ичида очилган Мурикини голли пас билан таъминлади. 31 ёшли косоволик ҳужумчи жамоасига ғалаба олиб келди ва тўпурарлар пойгасида 19 гол билан иккинчи ўринни мустаҳкамлади. 23 гол билан ушбу рўйхатни бошқараётган Килиан Мбаппега эса бу оқшом гол уриш насиб этмади.

«Барса» «Атлетико»ни таслим этди

«Атлетико» – «Барселона» 1:2
Голлар: Симеоне, 39 (1:0). Рэшфорд, 42 (1:1). Левандовски, 87 (1:2)
«Атлетико»: Муссо, Лангле (Тауфик Сейду, 68), Ле Норман, Гонсалес, Молина, Коке (Руджери, 46), Варгас, Алмада, Симеоне (Хименес, 61), Гризманн (Морсилио, 61), Баэна (Сёрлот, 61)
«Барселона»: Х. Гарсия, Кубарси, Мартин, Жоау Канселу, Араухо (Бернал, 40, Кунде, 62), Педри, Э. Гарсия (Гави, 78), Фермин Лопес (Торрес, 46), Рэшфорд (Левандовски, 79), Ямал, Ольмо
Огоҳлантиришлар: Гонсалес, 22. Коке, 45. Молина, 45. Муссо, 50. Лангле, 53. Тауфик Сейду, 90 – Фермин Лопес, 45. Мартин, 50
Четлатиш: Гонсалес, 45

«Атлетико» билан ўйин бошланишига бир неча соат қолганида «Барселона» «Малйорка»дан ажойиб совға олди. «Реал» ушбу аутсайдердан мағлубиятга учрагач, каталонияликлар ўз учрашувида ғалаба қозониш орқали энг яқин таъқибчиси билан орадаги фарқни 7 очкога етказиб олиш имкониятига эга бўлди. Якунда ҳам шундай бўлиб чиқди.

Лекин «Барса» учун ўйин осон кечмаслиги олдиндан маълум эди. Биринчидан, жамоанинг кўплаб футболчилари терма жамоалар йиғинига кетган ва базага қайтганига кўп вақт бўлмаганди. Жамоа етакчиларидан бири Рафиня эса Бразилиядан жароҳат билан қайтди, у энди камида бир ой майдонга туша олмайди. Қолаверса, Де Йонг ҳам ҳали сафга қайтмаган, Кунде ва Балде эса эндигина тикланди ва 90 дақиқа ўйнашга тайёр эмас. Қолаверса, «Атлетико» доим каталонияликлар учун қийин рақиб бўлиб келган – яқинда Испания кубогида учралган йирик мағлубиятни (0:4) ҳеч ким унутгани йўқ.

Ўз навбатида, «Атлетико»да ҳам йўқотишлар бор эди. Облак, Барриос, Пубил ва Мендоса жароҳатланган, Кардозо ва Лиоренте эса дисквалификацияга учраган. Симеоне жамоа барибир чемпионлик пойгасида эмаслиги, кучли тўртликни тарк этмаслиги, шунингдек, олдинда ЕЧЛ чоракфинали ҳам кутаётганидан келиб чиқиб (айнан каталонияликларга қарши ўйинлар), Хименес, Ганцко, Руджери, Лукман, Алварес ва Сёрлот каби асосий таркиб футболчиларини захира ўриндиғида қолдирди.

Дастлабки 10 дақиқани жамоалар разведка ишларига сарфлашди. Кейин эса аралаш таркибда тушганига қарамай, мадридликлар ташаббусни ўз қўлига олишди. Гризманнинг ўзида икки бор қулай имконият юзага келди, аммо унинг дастлабки зарбаси тўғри дарвозабонга борди, кейингисида дарвозабон ҳудудида туриб тўғри зарба беролмади. Бунга Ямал ўз финтлари ва ўзига хос паслари билан жавоб қайтарди. У икки марта Фермин Лопесни қулай вазиятга чиқарди, аммо меҳмонлар ҳужумчисига аниқлик етишмади. Ламиннинг ўзи гол уриши мумкин эди, аммо унинг зарбасидан кейин тўп тўсинга борди.

40-дақиқада эса Жулиано Симеоне марказий ҳужумчи позициясида пайдо бўлди. Бу сафар ҳам «Барса» офсайд чизиғини ушлашда хатога йўл қўйди ва аргентиналик футболчи яккама-якка вазиятга чиқиб бориб, Гарсияга ҳеч қандай имкон қолдирмади.

Аммо «Метрополитано»да йиғилган мухлисларнинг қувончи узоққа чўзилмади, уч дақиқа ўтиб Рэшфорд Олмонинг нозик узатмасини голга айлантирди.

Кейин эса Испания учун одатга айланган ҳакамлик томошаси юзага келди. Аввалига арбитр уч дақиқа мобайнида икки жамоа футболчиларини ажратиш билан шуғулланди, кейин эса ҳакамлар бригадаси беш дақиқа мобайнида Нико Гонсалеснинг қўполлик даражасини аниқлашга уринди.

Аргентиналик латерал Ямални қарши олишга улгурмаганди ва уни жарима майдони яқинида йиқитганди. Ҳакам аввалига сариқ карточка кўрсатиш билан кифояланганди, аммо видеотакрордан кейин карточканинг ранги қизилга ўзгарди ва «Атлетико» иккинчи бўлимда озчилик бўлиб ҳаракат қиладиган бўлди.

Аммо иккинчи бўлимда таркиблар сони тенглашиши ҳам мумкин эди – Жерар Мартин тўпни узоқлаштиришга уриниб, Варгаснинг тўпиғига бутсасининг остки қисми билан зарба бериб юборди ва ҳакам дарҳол қизил карточка кўрсатди. Аммо вазиятга яна VAR аралашди, якунда футболчи дастлаб тўпга ўйнаган деб топилди ва қизил бекор қилинди.

Қолган вақт мобайнида каталонлар тежамкор режимга ўтишди ва ўз вазиятини кутишди. Вазиятлар биринчи бўлимдагидек кўп бўлмаса-да кузатилиб турди. Ямал жарима майдони ташқарисидан айланма зарба йўллади, танаффусда Фермин ўрнига тушган Ферран Торрес эса қулай имкониятлардан фойдалана олмади.

Аммо «Барселона» барибир ўз мақсадига эришди – захирадан ўйинга қўшилган фахрий ҳужумчи Левандовски керакли вақтда керакли жойда пайдо бўлди ва дарозабондан қайтган тўп унинг елкасига теккан ҳолда барибир дарвоза тўрига кириб кетди.

Иродали ғалабага эришган кўк-анорранглилар энди «Реал» билан орадаги фарқни 7 очкога етказди. Катта эҳтимол билан, Испания чемпионлиги масаласи амалда ҳал бўлди. Диего Симеоне эса ҳафта ўртасида реванш олишга ҳаракат қилади.

п