Дубай авиасалонида HAL Tejas қирувчи самолёти ҳалокатга учради

Ҳиндистоннинг енгил кўп мақсадли HAL Tejas қирувчиси Dubai Airshow 2025 Халқаро авиация-космик кўргазмаси доирасидаги намойиш парвози пайтида қулади, учувчи оғир тан жароҳатлари олиб, ҳалок бўлди. Бу ҳақда жума куни, 21 ноябрда, Ҳиндистон Ҳаво кучлари хабар берди.

Ҳодиса жойидан олинган видеолавҳаларда самолётнинг кескин пастлай бошлагани ва ерга урилгани, шу заҳотиёқ ҳалокат жойида ёнғин ва қора тутун кўтарилгани акс этган.

Фожиа Дубайдаги Ал-Мактум халқаро аэропортида рўй берган, содир бўлаётган воқеани кўплаб томошабинлар кузатиб турган эди. Ҳодисадан сўнг сиреналар ишга тушгани ҳақида AP агентлиги хабар берди. Авария сабабларини аниқлаш учун тергов комиссияси тузилаётгани Ҳиндистон Ҳаво кучлари томонидан маълум қилинди.

Tejas — ҳинд қирувчиси бўлиб, уни давлатга қарашли Hindustan Aeronautics Limited (HAL) компанияси ишлаб чиқаради. Жорий йил сентябр ойида Ҳиндистон Мудофаа вазирлиги HAL билан Ҳиндистон Ҳаво кучлари учун 97 та Tejas самолётини харид қилиш бўйича шартнома имзолаган. Самолётларни етказиб бериш 2027 йилда бошланиши кутилмоқда.

2021 йилда ҳам Ҳиндистон ҳукумати HAL билан яна 83 та қирувчи хариди ҳақида келишув имзолаган эди. Бошланғич режага кўра, етказиб бериш 2024 йилда бошланиши керак эди, бироқ асосан АҚШдан импорт қилинадиган двигателлар танқислиги туфайли бу муддат кейинга қолдирилган.

Dubai Airshow дунёдаги энг йирик авиасалонлардан бири ҳисобланади. Бу йил у 19-марта ўтказилди. Кўргазма 17 ноябрда бошланган, 21 ноябр эса авиасалоннинг якуний иш куни бўлди.