Трамп Украина расмийларини ношукрликда айблади

Шунингдек, Европа Россиядан нефт сотиб олишда давом этаётганлигини айтди.

Фото: Getty images

Украина можарони ҳал қилишга қаратилган саъй-ҳаракатлари учун АҚШга ҳеч қандай миннатдорлик билдирмади, деди АҚШ президенти Доналд Трамп.

«Украина «раҳбарияти» саъй-ҳаракатларимиз учун нол миннатдорлик билдирди ва Европа Россиядан нефт сотиб олишда давом этмоқда. АҚШ Украинага тарқатиш учун НАТОга катта миқдорда қурол сотишда давом этмоқда», деб ёзди Трамп ўзига тегишли Truth ижтимоий тармоғида.

Америка раҳбарияти Украинани ношукрликда биринчи марта айблаётгани йўқ. Феврал ойи охирида Оқ уйда бўлиб ўтган АҚШ-Украина музокаралари чоғида Зеленский ва Трамп ўртасида жанжал келиб чиққан эди. Зеленский АҚШ билан фойдали қазилмалар бўйича келишувлар Украина хавфсизлигини таъминлаш учун етарли эмаслигини ва унга кафолатлар кераклигини айтганидан кейин суҳбат баланд овоздаги тортишувга айланди.

Трамп Зеленскийни ҳурматсизликда, АҚШ вице-президенти Жей Ди Вэнс эса ношукрликда айблади. Украина президенти бунга жавобан, кўрсатилган ёрдам учун АҚШга кўп марта миннатдорлик билдирганини эслатиб, Вэнс унинг мамлакатида ҳеч қачон бўлмаганини таъкидлади. Жанжалдан сўнг Украина делегацияси Оқ уйни муддатидан олдин тарк этди.