Трампнинг Украина бўйича режасидан 9 банд олиб ташланди – ОАВ

Россия ва Украина ўртасидаги урушни тугатиш бўйича АҚШ режаси Женевадаги музокараларда сезиларли даражада қайта кўриб чиқилди: у 28 банддан 19 бандга қисқартирилди, деб хабар берди Financial Times нашрининг муҳокамалар жараёнидан хабардор манбалари.

Қайси бандлар олиб ташлангани аниқ айтилмаган, бироқ бу Киев ва унинг европалик иттифоқчилари ҳужжатдаги бир қатор талабларнинг мақбул эмаслигини кўрсатганидан сўнг юз берди. Хусусан, Украина армия сонини чеклаш ва ҳудудий ён беришлар, жумладан Донбассни топшириш бўйича ўзининг «қизил чизиқлари»ни эслатиб ўтган эди. Европа уни қўллаб-қувватлади, шунингдек музлатилган Россия активлари бўйича қарор қабул қилиш ва Брюссел томонидан жорий этилган санкцияларни бекор қилиш масаласида ўзининг мутлақ ҳуқуқини таъкидлади.

«Ҳамма кўрган 28 бандли тинчлик режаси энди мавжуд эмас. Баъзи бандлар олиб ташланди, баъзилари ўзгартирилди», деб тасдиқлади Украина президенти девони раҳбари маслаҳатчиси Олександр Бевз. Унинг таъкидлашича, «Киевнинг бирорта эътирози эътиборсиз қолдирилмаган».

Илгари Оқ уй 23 ноябрь куни Женевада бўлиб ўтган музокаралар чоғида АҚШ ва Украина урушни тугатиш бўйича «янгиланган ва аниқлаштирган» режани ишлаб чиққанини маълум қилган эди. Шу билан бирга, томонлар келажакдаги ҳар қандай келишув Украина суверенитетини қўллаб-қувватлаши ва «барқарор ҳамда адолатли тинчликни таъминлаши» кераклигига келишиб олди.

АҚШ Давлат котиби Марко Рубио муаммога ечим топиш йўлида «улкан» ютуқларга эришилганини таъкидлади. Унинг сўзларига кўра, режа ҳали пухталаниши керак, бироқ «оқилона муддатларда» келишувга эришиш учун асослар бор. Якуний матнни АҚШ ва Украина президентлари Доналд Трамп ва Володимир Зеленский маъқуллаши керак, шундан сўнг ҳужжат Москвага юборилади.

«Ростдан ҳам Россия ва Украина ўртасидаги тинчлик музокараларида жиддий силжиш бўлиши мумкинми??? Ўз кўзингиз билан кўрмагунча ишонманг, лекин эҳтимол, яхши нарса содир бўлаётгандир», деб ёзди Трамп 24 ноябрь куни ўзининг Truth Social тармоғида. Бунгача у Украина режани 27 ноябргача қабул қилишини таъкидлаган, бироқ кейинчалик таклиф этилаётган ҳужжат АҚШнинг «якуний таклифи» эмаслигини айтган.

Европаликлар келгуси ҳафтада Франция, Германия ва Буюк Британия иштирокида навбатдаги учрашувларни кутмоқда. Шунингдек, муҳокамаларга Полша, Финляндия раҳбарлари ва НАТО бош котиби Марк Рютте ҳам қўшилиши мумкин. «Биз ҳаётий бўлган қарши таклифни ишлаб чиқишга ҳаракат қилмоқдамиз», деди дипломатлардан бири FT нашрига. Ўз навбатида, европалик амалдор агар натижага эришмаса, Трамп Украинани қўллаб-қувватлашни бутунлай тўхтатиши мумкинлиги хавфини тасдиқлади. «Биз бундай сценарийга ҳам тайёргарлик кўрмоқдамиз», деди у.

Кремль матбуот котиби Дмитрий Песков 24 ноябрь куни Москва АҚШдан Женевада тинчлик режаси бўйича музокаралар ҳақида расмий маълумот олмаганини айтди. Унинг сўзларига кўра, АҚШ ва Россия вакилларининг бу ҳафта учрашувлари ҳам режалаштирилмаган.