Fiat Topolino мини-электромобил АҚШ бозорига чиқди

7 июл куни Fiat компанияси (Stellantis концерни таркибига киради) ўзининг Topolino номли кичик электромобилини АҚШ бозорига чиқарди. Бу Америка бозоридаги энг ҳамёнбоп янги автомобиллардан бири бўлиб, нархи ва ихчам ўлчамлари билан дарҳол эътиборни тортди.

Fiat Topolino моделининг базавий нархи 13 995 доллардан бошланади. Етказиб бериш учун мажбурий йиғимни ($990) ҳисобга олганда, ҳақиқий бошланғич нарх (солиқлар ва рўйхатдан ўтказиш харажатларисиз) тахминан 14 985 долларни ташкил этади.

Икки асосий версия мавжуд: стандарт (ёпиқ кузовли) ва Dolce Vita — сафарлардан кўпроқ завқ олиш учун кабриолет элементларига эга очиқ версия. Иккала комплектация ҳам бир хил нархда, бу эса харидорлар учун танловни осонлаштиради.

Topolino — классик маънодаги тўлақонли автомобил эмас, балки паст тезликда ҳаракатланувчи транспорт воситаси (Low-Speed Vehicle / Квадроцикл) ҳисобланади.

Унинг асосий кўрсаткичлари:

• Бир қувватланишда тахминан 74 км масофа босади.

• Максимал тезлиги тахминан 40 км/соат билан чекланган.

Айнан шунинг учун ҳам модел шаҳар бўйлаб қисқа масофаларга қатнаш, ёпиқ ҳудудлар, кампусларда ва секин ҳаракатланишга мўлжалланган зоналарда юриш учун мос келади.

Ихчам ўлчамлар: узунлиги тахминан 2,5 метрдан сал ортиқроқ, оғирлиги — тахминан 487 кг. Оддий маиший розеткадан қувват олади.

Автомобил шаҳар учун мўлжалланган ва ҳамёнбоп эканлигини билдириб турувчи иккита ўриндиқ ва минималист интерьер билан жиҳозланган.

Topolino — 1936-йилги афсонавий моделнинг замонавий талқинидир. Fiat ушбу янги автомобилни катта машинага эҳтиёжи йўқ кишилар учун амалий ва жозибали ечим сифатида тақдим этмоқда.

Электромобиллар нархи ўсиб бораётган бир пайтда, рекорд даражадаги паст нарх туфайли ушбу моделнинг бозорга чиқиши катта қизиқиш уйғотди. Кўпчиликнинг таъкидлашича, Topolino, айниқса, узоқ масофа ва юқори тезлик талаб этилмайдиган шароитларда, ҳақиқий «халқчил» шаҳар электромобилига айланиши мумкин.

Бироқ танқидий фикрлар ҳам йўқ эмас: қувват захираси ва тезлигининг чекланганлиги уни трассалар ва узоқ сафарлар учун яроқсиз бўлган, тор доирага мўлжалланган маҳсулотга айлантиради.