Зеленский Трамп билан «имкон қадар тезроқ» учрашмоқчи

Украина президенти Володимир Зеленский тинчлик келишуви устидаги ишларни якунлаш учун АҚШ етакчиси Доналд Трамп билан «имкон қадар тезроқ» учрашмоқчи.

Бу ҳақда Axios нашрига Украина етакчиси офиси раҳбари Андрей Ермак хабар берди. Бу 27 ноябрь, «Шукроналик куни»да содир бўлиши мумкин, деб қўшимча қилди у.

«Умид қиламанки, президент Зеленскийнинг ташрифи имкон қадар тезроқ амалга ошади, чунки... бу президент Трампга ушбу урушни тўхтатиш бўйича тарихий миссиясини давом эттиришга ёрдам беради», деди Ермак.

Аввалроқ, АҚШ маъмурияти Россия-Украина урушини тугатиш бўйича 28 банддан иборат тинчлик келишуви режасини тақдим қилган эди. Украина билан музокаралардан сўнг, режадан 9 та банд олиб ташланди.

Axios нашрининг қайд қилишича, режанинг катта қисми аллақачон Украина билан келишилган, аммо ҳудудий ён беришлар асосий тўсиқ бўлиб қолмоқда - Зеленский айнан шу масалани Трамп билан бевосита муҳокама қилмоқчи.