Путин: декабр бошида Москвага АҚШ делегацияси келади

“Келгуси ҳафтанинг бошида”, яъни декабр ойининг илк кунларида, музокаралар учун АҚШ делегацияси Москвага келади. Бу ҳақда Россия президенти Владимир Путин 27 ноябр, пайшанба куни Бишкекда ўтказилган матбуот анжуманида билдирди. Путиннинг сўзларига кўра, Россия томонидан музокараларда унинг ёрдамчилари Владимир Мединский ва Юрий Ушаков, шунингдек Россия Ташқи ишлар вазирлиги вакиллари иштирок этади.

Шу билан бир вақтда Кремл раҳбари Москва Украина бўйича келгуси келишувлар “асосига” АҚШ президенти Доналд Трамп маъқуллаган, урушни тўхтатишга қаратилган 28 бандли режани қўйишга тайёр эканини билдирди ва энди “буни ҳуқуқий тилга кўчириш қолганини” таъкидлади.

Трамп 25 ноябр куни Truth Social ижтимоий тармоғидаги саҳифасида Путин билан Москвадаги учрашувга ўзининг махсус вакили Стивен Уиткоффни юборганини, Киевда Володимир Зеленский билан учрашув учун эса Украина бўйича музокарачи этиб тайинлаган генерал Дэн Дрисколлни жўнатганини ёзди. “28 банддан иборат дастлабки тинчлик режаси, АҚШ томонидан ишлаб чиқилган, икки томон қўшимча таклифлари асосида қайта ишланди, ва ҳозир унда ихтилоф келтириб чиқараётган атиги бир неча банд қолди”, — деб ёзди Оқ уй раҳбари.

Шу куни кечроқ у журналистларга Уиткофф Путин билан эҳтимол “келгуси ҳафтада” учрашишини айтди ва у билан биргаликда Трампнинг куёви ва маслаҳатчиси Жаред Кушнер ҳам боришини, у ҳам музокара жараёнида “иштирок этаётгани”ни қўшимча қилди.

CNN телеканали маълумотларига кўра, Киев ва Вашингтон позициялари ҳужжатнинг камида уч банди бўйича кескин фарқ қилади. Украина раҳбарияти Донбассдаги бир қатор муҳим ҳудудларни Россия назоратига бериш, Украина Қуролли Кучлари сонини тинч вақтда 600 минг нафаргача қисқартириш ва НАТОга аъзо бўлиш истиқболидан воз кечиш бандларига рози эмас.

Украинанинг АҚШдаги элчиси Ольга Стефанишина DW мухбирига айтганича, Дрисколл Киевга қайта таҳрир қилинган тинчлик режасини олиб келмоқда, ундан, жумладан, урушда иштирок этган барча шахсларга тўлиқ амнистия ҳақидаги “жуда баҳсга сабаб бўлувчи” банд олиб ташланган. Стефанишина режанинг бошқа бандларини ҳам синчковлик билан ўрганишга “катта қизиқиш” билдирилаётганини қайд этди — хусусан, “руслар ноаниқ ёки икки хил талқин қилиш мумкин бўлган формулировкалар орқали қанчалик кўп тузоқлар қўйганини” аниқлаш нуқтаи назаридан.

The Wall Street Journal газетаси ёзишича, Украинадаги урушни тугатиш бўйича 28 банддан иборат режанинг қораламасини гўёки Уиткофф ва Кушнер “Яқин Шарққа сафари”дан қайтар экан, Исроил ва ҲАМАС ўртасидаги келишув муваффақиятидан илҳомланиб ёзган. Бироқ The Insider нашрининг таъкидлашича, амалда бу режа Россия президентининг махсус вакили Кирилл Дмитриев томонидан Трампнинг иккинчи инаугурациясидан сўнг тузилган ҳужжатга асосланади.

Нашр маълумотларига кўра, ушбу ҳужжатга ҳозирги АҚШ маъмуриятининг қаттиқ “бизнесга йўналтирилган” ёндашувини инобатга олган ҳолда махсус “ўзига тортувчи” банди киритилган. Bloomberg эълон қилган стенограммага мувофиқ, 29 октябр куни Дмитриев телефон орқали Ушаков билан ўз режасини қандай қилиб АҚШ таклифлари сифатида кўрсатиш мумкинлигини муҳокама қилган.

Шунингдек, 28 банддан иборат “Трамп режаси” АҚШ маъмуриятига Россия томони топширган ҳужжат асосида тайёрланганини Reuters агентлиги ҳам маълум қилди. Агентлик маълумотларига кўра, бу Трампнинг Вашингтонда Володимир Зеленский билан октябр ўрталарида бўлиб ўтган, ОАВ хабар беришича, таранг муҳитда кечган учрашувидан сўнг юз берган.