Мадуро қачон истеъфога чиқиши мумкинлигини айтди – ОАВ

Венесуэла президенти Николас Мадуро АҚШ билан норасмий мулоқоти вақтида қачон истеъфога чиқишга тайёр бўлишини айтди, деб хабар берди CNN ўз манбасига таяниб. 

Хабарга кўра, Мадуро АҚШ вакиллари билан мулоқоти давомида 18 ойдан кам бўлмаган муддат ичида истеъфога чиқишини билдирган.  

Бироқ Оқ уйдагилар унинг зудлик билан истеъфога чиқиши кўзда  тутилган режани маъқуллашга қарор қилишган.  

29 ноябр куни АҚШ президенти Доналд Трамп Венесуэла осмони ёпилганини эълон қилганди. Венесуэла ҳукумати Трампнинг баёнотини «Венесуэла халқига нисбатан навбатдаги ғайриоддий, ноқонуний ва асоссиз тажовуз» деб атади. 

Сентябр бошидан буён АҚШ Кариб денгизи ва Тинч океанининг шарқий қисмида гиёҳванд моддалар ташишда гумонланган 20 дан ортиқ кемаларга зарбалар йўллаган, натижада камида 83 киши ҳалок бўлган.