Трамп Венесуэла осмони ёпилганини эълон қилди

АҚШ президенти Доналд Трамп Венесуэла устидаги ҳаво кенглиги буткул ёпилганини эълон қилди. Венесуэла ҳукумати Трампнинг баёнотини «Венесуэла халқига нисбатан навбатдаги ғайриоддий, ноқонуний ва асоссиз тажовуз» деб атади.

АҚШ октябр ойидан буён Кариб денгизи ҳавзасидаги ҳарбийлари сонини оширмоқда ва буни гиёҳвандлик моддалар савдосига қарши курашни кучайтириш зарурати билан изоҳламоқда. Венесуэла президенти Николас Мадуро бу даъволарни рад этади ва бўлаётган воқеаларни ўзини ҳокимиятдан ағдаришга уриниш деб ҳисоблайди.

«Барча авиакомпаниялар, учувчилар, гиёҳванд моддалар савдогарлари ва одам савдогарларига мурожаат қиламан, шуни ёдда тутингки, ВЕНЕСУЭЛА ВА УНИНГ АТРОФИДАГИ ҲАВО МАКОНИ ЁПИЛДИ. Эътиборингиз учун раҳмат!», – дея ёзди шанба куни АҚШ президенти Truth Social ижтимоий тармоғида.

«Венесуэла бугун ижтимоий тармоқларда АҚШ президенти томонидан эълон қилинган баёнотни қатъиян рад этади, унда у АҚШнинг Венесуэладаги ноқонуний юрисдикциясини экстерриториал тарзда қўллашга ҳаракат қилмоқда», – дея муносабат билдирди Венесуэла ТИВ.

Сентябр бошидан буён АҚШ Кариб денгизи ва Тинч океанинг шарқий қисмида гиёҳванд моддалар ташишда гумонланган 20 дан ортиқ кемаларга зарбалар йўллаган, натижада камида 83 киши ҳалок бўлган.

Аввалроқ АҚШ Федерал авиация бошқармаси (FAA) халқаро авиакомпанияларни Венесуэла яқинида кучайиб бораётган кескинлик туфайли янада эҳтиёткор бўлишга чақирган: бунга ҳарбий фаоллик кучайиши, минтақадаги беқарорлик ва хавфсизлик билан боғлиқ вазият ёмонлашгани сабаб қилиб кўрсатилган.

Натижада йирик авиаташувчилар парвозларни тўхтатишга қарор қилганди. Кейинчалик Каракас олтита авиакомпания – Iberia, TAP, Gol, Latam, Avianca ва Turkish Airlines’га ўз ҳудудида қўнишни тақиқлади (48 соат ичида парвозларни тиклашга улгурмагани учун).

АҚШ Венесуэла қирғоқларида фаол равишда ҳарбий иштирокини кучайтирмоқда. Минтақага «Жералд Форд» авиаташувчиси, атом сувости кемаси, денгиз пиёдалари ва бошқа жанговар кучлар юборилган.

Бу 1989 йилда Панамага бостириб кирганидан бери минтақадаги Америка қўшинларининг энг катта ўсишидир. Ноябр ойи ўрталарига келиб, минтақадаги америкалик ҳарбийлар сони 15 минг кишига етганди.

Пуэрто-Рико ҳудудида десант тушириш ва стратегик бомбардимончи самолётлар зарбаларини имитация қилиш бўйича машғулотлар ўтказилмоқда.

Буларнинг барчаси гиёҳванд моддалар савдосига қарши кураш шиори остида содир бўлмоқда, аммо таҳлилчилар асл мақсад президент Мадурони ағдариш деб ҳисобламоқда.

Венесуэлада август ойи охиридан умуммиллий сафарбарлик эълон қилинган.