Улуғбек Мустафоев Жиззах вилояти ҳокими лавозимига тасдиқланди

У сўнгги бир йилга яқин вақт давомида ҳоким вазифасини бажариб келаётганди.

Фото: Президент матбуот хизмати

Улуғбек Мустафоев Жиззах вилояти ҳокими лавозимига тасдиқланди. Тегишли қарор Халқ депутатлари Жиззах вилояти Кенгашининг навбатдан ташқари сессиясида қабул қилинди.

Сессияда президент Шавкат Мирзиёев Жиззах вилояти ҳокими лавозимига ҳоким вазифасини бажариб келаётган Улуғбек Мустафоев номзодини илгари сурган.

Халқ депутатлари ва вилоят фаоллари номзод ҳақидаги фикрларини билдиришган. Шундан сўнг вилоят ҳокимини тайинлаш масаласи овозга қўйилган. Овоз бериш натижаларига кўра, Улуғбек Мустафоев Жиззах вилояти ҳокими этиб тасдиқланди.

Давлат раҳбари янги ҳоким билдирилган ишончни оқлаб, кейинги йилда вилоятга 4,5 миллиард доллар хорижий инвестиция олиб келиш, экспортни 500 миллион долларга етказиш, 175 минг одамни ишли қилиш, 15 минг оилани камбағалликдан чиқариш борасида қаттиқ ишлаши кераклигини кўрсатиб ўтди.

Улуғбек Мустафоев 1968 йил 14 августда Жиззах вилоятида туғилган. 1991 йилда Тошкент халқ хўжалик институтини тамомлаган («Молия ва кредит» мутахассислиги) ва банк соҳасида фаолият юритган.

Хусусан, 2010 йилдан 2016 йилгача Марказий банк раисининг биринчи ўринбосари сифатида ишлаган, 2016–2017 йилларда Жиззах вилояти ҳокими биринчи ўринбосари бўлган. 2017 йил июнида «Ўзбекэнерго» АЖ бошқаруви раиси лавозимига тайинланган.

2019 йил мартида мазкур ташкилот ислоҳ қилиниб, ўрнида «Иссиқлик электр станциялари» АЖ, «Ўзбекистон миллий электр тармоқлари» АЖ ҳамда «Ҳудудий электр тармоқлари» АЖ ташкил этилади. Улуғбек Мустафоев эса «Ҳудудий электр тармоқлари» АЖ бошқаруви раиси лавозимида ишлай бошлайди.

У 2024 йил 19 декабрда Эргаш Солиев ўрнига Жиззах вилояти ҳокими вазифасини бажарувчи этиб тайинланганди.

Тайёрлаган: Азиз Қаршиев

#тайинлов #Жиззах вилояти #Улуғбек Мустафоев