НАТО вакили: Россия Покровскнинг 95 фоизини назорат қилмоқда

Украинага қарши тўлиқ миқёсдаги ҳужумини давом эттираётган Россия қўшинлари Донецк вилоятидаги Покровск ҳудудининг 95 фоизини назорат қилмоқда. Бу ҳақда сешанба куни, 2 декабрда Брюсселдаги штаб-квартирада ўтказилган брифингда НАТОнинг юқори мартабали расмийси DW мухбири саволига жавобан айтиб ўтди.

Унинг сўзларига кўра, ҳозир Украина ушбу шаҳардан қўшинларни тартибли равишда олиб чиқмоқда, аммо Покровскда ҳали ҳам украин кучларининг кичик-катта қаршилик ўчоқлари мавжуд.

Шу билан бирга, НАТО вакили Россия Покровскни эгаллаб олишни бир йилдан кўпроқ вақт олдин режалаштирганини эслатди, аммо бу мақсадга жуда секин эришилган ва шу йўлда жуда кўп россиялик ҳарбийлар ҳаёти қурбон қилинган. Шу вақт давомида украинлар эса шаҳар йўқотилиши аввалдагидан кўра стратегик жиҳатдан унча катта аҳамиятга эга бўлмаслиги учун зарур чораларни кўришга улгурганига ишора қилинди.

Агар Покровск тўлиқ эгаллаб олинса, Россия, катта эҳтимол билан, ушбу шаҳардан логистика маркази ва Донецк вилоятидаги бошқа шаҳарларга ҳужум қилиш учун плацдарм сифатида, шунингдек дронларни учириш базаси сифатида фойдаланади, деб ҳисобламоқда НАТО. Бироқ Покровскнинг қулаши Украина мудофаасининг муқаррар емирилиши дегани эмас, алянс яқин истиқболда бундай сценарийни эҳтимоли паст, деб ҳисоблайди.

НАТОда ҳозирча Покровск учун олиб борилган жанглардаги Россия талафотлари бўйича аниқ маълумот йўқ. Шу билан бирга, алянсда таъкидланишича, жорий йил давомида Россия қуролли кучлари тахминан 360 минг ҳарбийни йўқотган ва уларнинг асосий ҳужум йўналиши айнан Покровск бўлган. Шу сабабли, ушбу йўналишда ҳар куни бир неча юз нафар россиялик ҳалок бўлаётганини тахмин қилиш мумкин, деди НАТО вакили.

Бир кун аввал Кремл матбуот котиби Дмитрий Песков Россия Украинадаги Покровск ва Харкив вилоятидаги Волчанск шаҳарларини тўлиқ эгаллаб олганини маълум қилди. Унга кўра, бу ҳақда Россия президенти Владимир Путинга 30 ноябр, якшанба куни, Бирлашган қўшинлар гуруҳининг бошқарув пунктларидан бирига ташрифи вақтида Россия Бош штаби раҳбари Валерий Герасимов маълумот берган.

Шу куни Украина Қуролли кучлари Бош штаби кечки кундалик ҳисоботида Покровск йўналишида жанглар ҳали ҳам давом этаётганини хабар қилди. Ҳисоботда Волчанск яқинидаги жанглар ҳам тилга олинган. Бош штаб ҳисоботида Украина қўшинларининг янги позицияларга чекиниши ҳақида маълумот берилмаган.

Украина президенти Володимир Зеленский ҳам 1 декабр куни кечқурун, Парижда Франция президенти Эммануэл Макрон билан учрашувдан кейин, Россия Қуролли кучлари томонидан Покровск ва Волчанскнинг тўлиқ эгаллаб олингани тўғрисидаги маълумотларни рад этди. Шу билан бирга, у Покровск ва бошқа йўналишлардаги вазият «ҳали ҳам мураккаблигича қолаётганини» таъкидлади.