Зеленский: урушни якунлаш шартлари бўйича оддий ечимлар йўқ

Россиянинг Украинага қарши урушига чек қўйиш шартлари бўйича оддий ечимлар бўлмайди, ва Киев буни тушунади, деди Украина президенти Володимир Зеленский. Бироқ қарорларни қабул қилишда адолат ва очиқлик муҳим, шунингдек бу жараёнга Украинанинг ўзи жалб этилган бўлиши керак, дея ёзди у сешанба куни, 2 декабр куни Telegram’да. У буни Москвада Россия президенти Владимир Путин ва Трампнинг махсус вакили Стивен Уиткофф ўртасидаги учрашув вақтида ёзди.

Зеленский тинч йўл билан урушни тартибга солиш доирасида ҳал қилиниши лозим бўлган учта энг қийин масалани санаб ўтди. Унинг фикрича, булар — Россия томонидан босиб олинган Украина ҳудудлари муаммоси, музлатиб қўйилган Россия активлари масаласи ва Украина учун хавфсизлик кафолатлари.

«Биз Қўшма Штатлар ва Европа томонидан, шунингдек яна бир қатор бошқа етакчилар томонидан кучли хавфсизлик кафолатларига умид қиламиз. Бу “Кўнгиллилар коалицияси”нинг мавзуларидан бири. Биз бунинг устида ишлаяпмиз», — деб таъкидлади Украина президенти.

Зеленский, шунингдек, ўз мамлакатидаги қон тўкилишни тез орада тўхтатиш зарурлиги ҳақидаги АҚШ позициясини тўлиқ қўллаб-қувватлашини билдирди. «Аммо биз бу урушни шундай тарзда якунлашимиз керакки, орадан бир йил ўтгач, Россия учинчи ҳужум билан яна қайтиб келмасин. Улар мамлакaтимизни оккупация қилиш мақсадига эриша олмади. Лекин мен уларнинг мақсадлари ўзгарганига ишончим комил эмас. Улар фақат кечиктирилиши мумкин, биз эса шундан ҳимояга муҳтожмиз», — деди у.

Унинг сўзларига кўра, Киев АҚШ делегациясининг Россиядаги учрашувларидан кейинги сигналларни кутяпти. «АҚШ делегацияси учрашувлардан кейин дарҳол айнан бизга ҳисобот беришни хоҳлаяпти. Кейинги қадамлар ана шу сигналларга боғлиқ», — деди Зеленский ва яқин орада америкаликлар томони вакиллари, жумладан АҚШ президенти Доналд Трамп билан учрашув бўлиб ўтиши мумкинлигини ҳам истисно этмади.

Худди шу куни Москвада Путин ва Уиткофф учрашуви бўлиб ўтди, унда, шунингдек, АҚШ президенти Доналд Трампнинг куёви Жаред Кушнер ҳам иштирок этди. Музокараларнинг мавзуси — Россиянинг Украинага қарши урушига чек қўйиш шартлари, жумладан бу масала бўйича АҚШ томонидан келтирилган таклифлар муҳокама қилинди.

Россия президенти матбуот котиби Дмитрий Песков таъкидлашича, Путин билан Вашингтон вакиллари ўртасидаги учрашувга аниқ вақт чегаралари қўйилмади ва у «қанча керак бўлса, шунча давом этди».

Ўтган дам олиш кунлари Уиткофф, 2025 йил давомида Путин билан бир неча бор учрашган ҳолда, Флоридада Америка делегациясининг Украина вакиллари билан бўлиб ўтган учрашувида ҳам иштирок этди. Томонлар АҚШнинг тинчлик режасига оид турли жиҳатларни муҳокама қилди. Иштирокчилар музокараларни конструктив деб баҳолади ва олға силжиш борлигини қайд этди, аммо учрашув якунида аниқ келишувларга эришилгани ҳақида хабар берилмади.