Трамп: Путин келишув тузишни ва «нормал ҳаётга қайтишни» истаяпти

АҚШ президенти Доналд Трамп таъкидлашича, унинг вакиллари Стивен Уиткофф ва Жаред Кушнернинг Москвада Россия президенти Владимир Путин ва унинг ёрдамчилари билан учрашуви «анча муваффақиятли» бўлган. Бу ҳақда Америка етакчиси чоршанба куни, 3 декабрда, Оқ уйда журналистлар саволларига жавоб берар экан маълум қилди.

«Менимча, улар кеча президент Путин билан жуда яхши учрашув ўтказди. Бундан нима чиқади? Айта олмайман, чунки танго учун иккита киши керак. <...> Лекин ўйлайманки, биз улар билан жуда яхши ишладик — жуда мамнунмиз», — деди Трамп AFP агентлиги мухбирининг саволига жавобан.

Президент, шунингдек, телефон орқали гаплашган Уиткофф ва Кушнерда Путин «келишув тузишни», «урушга чек қўйишни» ва «нормалроқ ҳаётга қайтишни» истаяпти, деган «қатъий таассурот» ҳосил бўлганини айтди.

Украина ҳақида сўзлар экан, Трамп ушбу мамлакат вакиллари АҚШнинг тинчлик режасига нисбатан «анча яхши» муносабатда эканини таъкидлади. Шу билан бирга, у Украина раҳбарияти келишувга рози бўлиши керак, деб ҳисоблашини, буни жорий йил феврал ойида, Оқ уйда Украина президенти Володимир Зеленский билан учрашув чоғида айтганини эслатди.

«Мен шунда: “Сизларда қарталар йўқ”, деган эдим. Ана ўшанда келишиш пайти келган эди», — деб қўшимча қилди АҚШ президенти.

Associated Press агентлигига АҚШ президенти маъмуриятидаги юқори мартабали вакил маълум қилишича, Уиткофф ва Кушнернинг Украина делегацияси билан кейинги музокаралари 4 декабр куни Майамида бўлиб ўтади. Украина томонидан делегацияга мамлакат Миллий хавфсизлик ва мудофаа кенгаши котиби Рустем Умеров раҳбарлик қилади.

Музокараларни давом эттиришга тайёргарлик кўрилаётгани ҳақида Украина президенти Володимир Зеленский ҳам айтди. 3 декабр куни кечқурунги мурожаатида давлат раҳбари яқин кунларда Украина ва АҚШ томонларининг «учрашувлари, алоқалари, музокаралари» бўйича янгиликлар кутилаётганини таъкидлади.

«Ҳозир ҳаммаси етарлича самарали кечмоқда — Женевадаги ва Флоридадаги учрашувларда Украинани эшитишди ва тинглашди. Бу жуда муҳим. Биз келгусида ҳам худди шундай бўлишига умид қиламиз», — деди президент.