ЕИ Маскнинг X ижтимоий тармоғига 120 млн евро жарима солди

Оқ уй томонидан қилинган таҳдидларга қарамасдан, ЕИ биринчи марта Рақамли хизматлар тўғрисидаги қонун доирасида Америка технология компаниясига нисбатан жарима қўллади. Еврокомиссия жума куни, 5 декабр куни, миллиардер Илон Маскка тегишли бўлган X микроблог сервисини реклама ва фойдаланувчи аккаунтлари шаффоф эмаслиги учун жаримага тортганини маълум қилди.

“Бундан кўзланган мақсад — рақамли қонунчилигимиз бажарилишини таъминлаш”, — деди Еврокомиссиянинг технологик суверенитет ва хавфсизлик бўйича вице-президенти Хенна Вирккунен X’га нисбатан қўлланган жаримани изоҳлар экан.

Европа регуляторининг таъкидлашича, X ижтимоий тармоғи “кўк белги”га эга верификация қилинган аккаунтлар учун ўз интерфейсини нотўғри тарзда ишлаб чиқмоқда ва қўлламоқда, натижада фойдаланувчилар аккаунтларнинг ҳақиқийлиги ва у ерда чоп этилаётган контент ишончлилигига шубҳа билдириши мумкин. Бундан ташқари, Еврокомиссия маълумотларига кўра, микроблог сервисида реклама шаффофлиги талаблари бажарилмаяпти ва регуляторларга оммавий фойдаланишдаги маълумотлар базаларига етарли даражада кириш имкони берилаётгани йўқ.

Еврокомиссия X’га “кўк белги”га оид қоидабузарликларни бартараф этиш учун 60 кун, реклама шаффофлиги ва маълумотларга кириш масалаларини ҳал қилиш учун эса 90 кун муҳлат берди.

X'га нисбатан суриштирув 2023 йилда бошланган. 2024 йил ёзида Еврокомиссия ижтимоий тармоқ ЕИнинг рақамли хизматлар тўғрисидаги қонунининг бир қатор моддаларини бузганини билдирган эди. Европа Иттифоқида X микроблог сервисига нисбатан бошқа суриштирув ишлари ҳам олиб борилмоқда. Жумладан, улар платформа томонидан ғайриқонуний контент тарқалишига ва маълумотлар билан манипуляция қилинишга қарши кўрилаётган чораларга тааллуқли.

АҚШ вице-президенти Жей Ди Вэнс Брюсселни Америка компанияларига ҳужумда айблади. У жавоб қарори эълон қилинишидан олдин X’да ёзиб, платформани “цензура билан шуғулланмаётгани учун” жазолашмоқда, деб таъкидлаган. “ЕИ сўз эркинлигини қўллаб-қувватлаши керак, Америка компанияларига ҳужум қилмаслиги керак”, — дея Вэнс Европа регуляторининг ҳаракатларини танқид қилди.

Еврокомиссар Вирккунен бу айбловларни рад этди. У X’га нисбатан қўлланган жаримани мутаносиб чора деб атади ва унинг “цензурага ҳеч қандай алоқаси йўқ”лигини таъкидлади. Унга кўра, қарор қабул қилаётганда ЕИ “ҳуқуқбузарликларнинг фойдаланувчиларга таъсири ва улар қанча муддат давом этгани нуқтаи назаридан жиддийлигини” инобатга олган.

Бунгача АҚШ президенти Доналд Трамп маъмурияти ЕИнинг рақамли қонунларини бир неча маротаба кескин танқид қилган. Оқ уй раҳбари айрим мамлакатлар қонунлари, унинг фикрича, “Америка компанияларига зарар етказишга қаратилган” деб ҳисоблаган ва бунинг учун ушбу давлатлардан импорт қилинадиган товарларга янги тарифлар жорий этиш билан таҳдид қилган. Ушбу таҳдидларга қарамасдан, ЕИ ўз қоидаларига риоя этишга қатъий бел боғлаганини таъкидлаб келади.