Аш-Шаръадан Билл Гейтс, Клинтонгача: Доҳа форуми қандай ўтди? 

Қатардаги Доҳа форумида амирдан тортиб Сурия муваққат президенти Шаръа, АҚШ собиқ давлат котиби Ҳиллари Клинтон, миллиардер Билл Гейтс ва юзлаб вазирлар қатнашди. Сессияларнинг деярли ҳаммаси тинчлик масалаларига бағишланган. Форум доирасида олий даражадаги меҳмонлар жонли эфирда интервюлар ҳам беришди. Kun.uz журналистининг Доҳадан хабар беришича, Аҳмад аш-Шаръа ўз сессиясида уни ортиқ террорчи демасликларини сўраган.

Доҳа форуми геосиёсий кескинликнинг кучайиши, гуманитар эҳтиёжларнинг чуқурлашиши ва технологик узилишларнинг тезлашиши авж олган паллада ўтказилди. 

Форумни шахсан амир очди, унинг синглиси сессияларда қатнашди, онаси Шейха Моза эса форумни ёпиб берди. Сессиялар бир-биридан қизиқ, иштирокчилар ранг-баранг, қатнашчилар минглаб. Доҳа форумининг бу йилги мавзуси – тинчлик ва адолатга аталган. Яъни қаердаки можаролар бор, уларнинг ечимлари муҳокама майдони сифатида шу форум таклиф этилмоқда. Қатнашчилар ичида Сурия муваққат президентининг ҳам борлиги – мулоқот мавзусига мос тушади. 

CNN телеканали журналисти Аш-Шаръадан эксклюзив интервю олди, лекин у суҳбат чоғида Шаръани ноқулай аҳволда қолдирувчи саволларини ҳам берди. Аввало, журналист унинг террорчилик ўтмиши ҳақида сўради. Сурия президенти эса ортиқ террорчи сифатида рўйхатда турмаслигини айтди. 

“Биз террорист сўзини 25 йилдан бери ишлатамиз, лекин аслида бугун ким террорист эканини Ғазодаги воқеалар сабаб одамларнинг ўзи билиб олди. Мен ҳақимдаги саволда зиддиятлар жуда кўп. Аввало, мен ҳеч қачон тинч аҳоли вакилларига қарши урушмаганман. Ўтган йилги Сурияни олишимиздаги 11 кунлик режани эсланг, тинч аҳоли вакиллари қурбон қилинмай шу даражада режа тузган қайси террорчини биласиз? Ваҳоланки, мен энди Хавфсизлик кенгашининг террорчилар рўйхатида эмасман”, - деди Шаръа. 

Яна бир қизиқ сессия АҚШ президентининг ўғли – кичкина Доналд Трампники. У медиага Қатарда ҳеч қандай бизнеси йўқлигини айтган. 

“Биз ҳар қандай инвестициямизни АҚШга қиламиз, Қатарда ҳеч қандай бизнесим йўқ”, - дейди кичкина Доналд Трамп. 

Форум 2 кун давом этди, унда Ўзбекистон делегацияси ҳам қатнашди. Халқаро мулоқотда Ўзбекистон Афғонистон сессиясини ўтказди, қатнашчилар ичида “Толибон” вакили ҳам бор.