Лондон Дугин ва "Рыбарь" Telegram-каналига нисбатан санкция жорий этди

Буюк Британия Россия Федерациясининг яна икки фуқароси ва бешта юридик шахсини санкциялар рўйхатига киритди. Хусусан, чеклов чоралари "рус олами" идеологи, фалсафа доктори Александр Дугин ва "Рыбарь" Telegram-канали орқали материаллар чоп этувчи блогер Михаил Звинчукка нисбатан жорий этилди. Бу ҳақдаги маълумот янгиланган ҳужжатда келтирилган бўлиб, у сешанба, 9 декабр куни Британия ҳукумати сайтида эълон қилинди.

Ташкилотлар орасида Дугин асос солган Геосиёсий экспертизалар маркази, Звинчукнинг "Рыбарь" лойиҳаси ва шу номдаги Telegram-канали, Россия Ташқи ишлар вазирлиги ҳамда "Россотрудничество" томонидан тузилган Чет элда истиқомат қилувчи ватандошлар ҳуқуқларини ҳимоя қилиш ва қўллаб-қувватлаш жамғармаси, шунингдек, Белгияда жойлашган рус тилидаги "Голос" ва Euromore медиалойиҳалари бор.

Санкциялар Бирлашган Қиролликка киришни тақиқлашни, шунингдек (мавжуд бўлган тақдирда) активларни музлатиб қўйишни назарда тутади.

Британия ҳокимияти маълумотларига кўра, ушбу барча тузилмалар "Украинани беқарорлаштиришда иштирок этади", яъни Украина ҳудудий яхлитлиги, суверенитети ёки мустақиллигига таҳдид солувчи ҳаракатларни қўллаб-қувватлайди ёки илгари суради, ёхуд "Россия ҳукуматини қўллаб-қувватлагани учун фойда кўради".

Лондоннинг асосларига муносабат билдириб, "Рыбарь" канали шундай ёзди: "Махсус ҳарбий операция бошланиб, 4 йил ўтгач эътибор беришди" (Россияда Украинага қарши уруш шундай аталади. – Таҳр.). Шу билан бирга, канал муаллифлари, аслида санкциялар жорий этилишининг ҳақиқий сабаби "лойиҳа жамоасининг Британиянинг Россия ва дунёдаги деструктив таъсирига қарши олиб бораётган фаолияти" эканлигига ишонч билдирди.

Дугин эса ўзини қора рўйхатга киритиш бўйича қарорни изоҳламади.