Мерц: Украина иштирокисиз тинчлик шартномасини тасаввур қилиб бўлмайди

2025 йил 9 декабр, сешанба куни Берлинда Арманистон бош вазири Никол Пашинян билан учрашувдан кейин журналистлар олдида сўзлар экан, у Киев манфаатларига зид бўлган "диктаторлик руҳидаги тинчлик"дан огоҳлантирди.

«Украина бўйича қарорни Украина иштирокисиз қабул қилишни қандай тасаввур қилиб бўлмаса, Европа бўйича қарорни европаликлар иштирокисиз қабул қилишни ҳам худди шундай тасаввур қилиб бўлмайди», — деди Мерц DW мухбири саволига жавоб бериб.

Унинг эслатишича, бундан бир кун олдин у Лондонда Буюк Британия бош вазири Кир Стармер, Франция президенти Эммануэл Макрон ва Украина президенти Володимир Зеленский билан музокаралар ўтказган. Ўша музокаралар чоғида Украинада тинчликка эришишнинг эҳтимолий йўллари муҳокама қилинган.

Фридрих Мерцнинг сўзларига кўра, ҳозирда шу масала бўйича тегишли қўшма таклифлар ишлаб чиқилмоқда. «Ушбу таклифлар яқин кунларда АҚШ ҳукумати билан ҳам мувофиқлаштирилади. Шундан кейин Россия томони билан кейинги музокаралар бўлиб ўтади», — деди у.

Германия ҳукуматининг раҳбари таъкидлашича, бу урушни Украина эмас, балки Россия олиб бормоқда ва айнан Россия ушбу урушни «бир неча соат ичида» тугатиш имкониятига эга.

«Биз барчамиз бунинг иложи борича тезроқ тугашидан жуда манфаатдормиз. Бунинг учун шароитлар бор-йўқлиги эса, эҳтимол, яқин кунларда, балки ҳафталар давомида маълум бўлади», — деб қўшимча қилди Мерц.