Статистика: Ўзбекистон аҳолисининг асосий қисми хусусий ҳовлиларга эга

2025 йил январ–сентябр ойларидаги уй хўжаликлари танланма кузатувлари натижалари асосида Ўзбекистонда уй хўжаликларининг 88,1 фоизи алоҳида уй (хусусий ҳовли)ларда истиқомат қилмоқда. Кўп квартирали уйларда яшовчи уй хўжаликлари улуши эса 11,7 фоизни ташкил этди.

Фото: ЎзА

Миллий статистика қўмитасининг 2025 йил январ–сентябр ойларида ўтказилган уй хўжаликлари танланма кузатувлари маълумотлари мамлакатда аҳолининг уй-жой турлари бўйича тақсимланишини намоён этмоқда.

Расмий маълумотларга кўра, уй хўжаликларининг 88,1 фоизи алоҳида уй (хусусий ҳовли)ларда истиқомат қилади. Бу кўрсаткич хусусий ҳовли туридаги турар жойлар ҳали ҳам Ўзбекистон уй-жой инфратузилмасида устувор ўринни эгаллашини англатади.

Шу билан бирга, уй хўжаликларининг 11,7 фоизи кўп квартирали уйларда яшайди. Урбанизация жараёнлари, йирик шаҳарларда кўп қаватли уй-жойлар барпо этилиши ва ипотека бозорининг ривожланиши ушбу сегмент улушининг босқичма-босқич ортаётганини кўрсатмоқда.

Қолган 0,2 фоиз уй хўжаликлари бошқа турдаги уй-жойларда – вақтинчалик турар жойлар, хизмат уйлари ёки ноанъанавий турар жой шаклларида истиқомат қилаётгани қайд этилган.

Ушбу статистик маълумотлар уй-жой сиёсати, шаҳарсозлик режалаштириши, инфратузилма ва коммунал хизматларни ривожлантириш, қишлоқ ва шаҳар ҳудудларини мутаносиб ривожлантириш бўйича қарорлар қабул қилишда муҳим манба бўлиб хизмат қилади.

Тайёрлаган: Отабек Матназаров

#статистика #уй-жой