Зеленский уруш даврида сайловлар ўтказишга тайёрлигини билдирди

АҚШ президенти Доналд Трампнинг Украинада президентлик сайловларини ўтказиш зарурлиги тўғрисидаги баёнотига жавоб қайтарар экан, Украина раҳбари Володимир Зеленский маълум шартлар бажарилган тақдирда бундай сайловларни ўтказишни инкор этмади. «Мен сайловларга тайёрман», — деди у сешанба, 9 декабр куни украин ва хорижлик журналистлар билан мулоқот чоғида.

Зеленскийнинг сўзларига кўра, агар Украинага овоз бериш жараёни пайтида хавфсизлик кафолатлари бериладиган бўлса, сайловлар яқин 60–90 кун ичида ўтказилиши мумкин. Хавфсизликни таъминлашда ёрдам беришни у АҚШ ва европалик ҳамкорлардан сўради.

Зеленский тилга олган иккинчи шарт — «сайловларни ҳарбий ҳолат шароитида ўтказишнинг легитимлигини таъминлайдиган қонунчилик асосларининг мавжуд бўлиши». У ҳарбий ҳолат даврида сайлов ўтказиш тартибини ўзгартириш учун зарур бўлган қонун лойиҳасига ўзгартиришлар киритишни Олий рада депутатларидан сўраганини қайд этди.

Бундан олдин, шу куннинг ўзида, Доналд Трамп Украинада «аллақачон» янги президентлик сайловларини ўтказиш вақти келганини айтди ва мамлакат раҳбарияти гўёки урушни баҳона қилиб, бу ишни амалга оширмаётганини иддао қилди. «Менимча, украин халқи бундай танловга эга бўлиши керак. Ва эҳтимол, Зеленский ғолиб чиқарди», — деди у Politico нашрига берган интервюсида. Украинада уруш тугагач сайловлар ўтказиш ҳақидаги банд АҚШ президентининг тинчлик режасида ҳам назарда тутилган эди.

Амалдаги украин қонунчилигига биноан, мамлакатда ҳарбий ҳолат даврида сайловлар ўтказиш тақиқланади. Россия Федерациясининг тўлиқ кўламли ҳужуми бошланганидан сўнг жорий этилган ҳарбий ҳолат туфайли 2024 йилда бўлиб ўтиши керак бўлган навбатдаги президентлик сайловлари кейинга қолдирилди. Кремл бу ҳолатдан Зеленскийни «нолегитимлик»да айблаш учун бир неча бор фойдаланган.

Доналд Трампнинг иккинчи президентлик муддати бошланганидан бери, жанглар давом этаётганига қарамасдан, сайловлар ўтказиш масаласи юзасидан мунозаралар қайтадан жонланди. Трамп ҳам бундай сайловларни ўтказишга чорлади, аммо Киевда бу қарорни амалга ошириш имконсизлиги ҳақида баёнотлар берилган. Жумладан, 2025 йил апрелида Олий раданинг ўзида президентлик сайловларига тайёргарлик кўрилаётгани ҳақидаги хабарлар рад этилди.