Ҳегсет Дрисколлни Украина бўйича музокаралардан четлатди – ОАВ

Дэниел Дрисколл ваколат доирасидан чиқиб кетганликда айблангани таъкидланмоқда.

Фото: PA Media

Пентагон раҳбари Пит Ҳегсет АҚШ армияси вазири Дэниел Дрисколлни Украинадаги вазиятни тартибга солиш бўйича музокаралар жараёнидан четлатди. Ҳегсетнинг фикрича, вазир ваколат доирасидан чиқиб кетган. Бу ҳақда The Telegraph манбаларга таяниб хабар берди.

«У (Дэниэл Дрисколл) ўз зиммасига жуда кўп нарсани олиб юборди ва шунинг учун жазоланди», деди газета суҳбатдоши. Нашр манбалари Пентагон раҳбарини «параноик» деб атаган.

Ноябр ойида Дэниэл Дрисколлга Украина президенти Володимир Зеленскийга Россия-Украина можаросини ҳал қилиш бўйича АҚШ режасини тақдим этиш топширилган эди. Учрашув муваффақиятсиз ўтди ва Украина томони АҚШ таклифларини рад этди, деб ёзди The Telegraph.

Икки ҳафта олдин Дрисколл музокараларни давом эттириш учун яна Киевга бориши керак эди, бироқ унинг ташрифи бекор қилинди, деб ёзди газета. Шунингдек, у 1 декабр куни Парижда Зеленский ва Франция президенти Эммануэл Макрон билан музокаралар ўтказишни режалаштирган эди, бироқ Дрисколл учрашувни яна бекор қилди.