Уиткофф Зеленский ва Европа етакчилари билан учрашади

АҚШ президенти Доналд Трампнинг махсус элчиси Стивен Уиткофф, шунингдек Трампнинг куёви ва маслаҳатчиси Жаред Кушнер Европа етакчилари ҳамда Украина президенти Володимир Зеленский билан дам олиш кунлари Берлинда учрашади. Учрашувлар аниқ қайси вақтда бошланиши айтилмаган, аммо 14–15 декабр кунлари Уиткофф Германия, Франция ва Буюк Британия вакиллари билан музокаралар ўтказиши кутилмоқда. Бу ҳақда жума куни, 12 декабрда, манбаларга таяниб, АҚШнинг The Wall Street Journal (WSJ) газетаси хабар берди. Оқ уй вакили бу маълумотни тез орада AFP агентлигига тасдиқлади.

Зеленскийдан ташқари, Уиткофф билан Германия канцлери Фридрих Мерц, Франция президенти Эммануэл Макрон, Буюк Британия бош вазири Кир Стармер, шунингдек Украина бўйича тинчлик музокаралари билан шуғулланаётган ушбу давлатларнинг бошқа вакиллари ҳам учрашади.

Аввалроқ Европа етакчилари дам олиш кунларида АҚШ президенти Доналд Трамп билан ҳам учрашув ташкил этишга умид қилган эди. ОАВ бу учрашув 13 декабр куни Парижда бўлиб ўтади, деб ёзган, аммо RMF Полша радиостанцияси Елисей саройидаги манбага таяниб хабар қилишича, шу куни Франция пойтахтида бундай тадбир режалаштирилмаган.

Бир кун олдин Оқ уй вакили Кэролайн Ливитт Германия пойтахтидаги учрашувга АҚШга йўлланган таклиф ҳақида фикр билдириб, Оқ уй фақат “тинчлик келишувини имзолаш учун реал имконият пайдо бўлса” ва “бу учрашувлар сарфланган вақтга арзийди”, деган тасаввур бўлсагина ўз вакилини юборишини айтган эди.

“Унга (Трампга — таҳр.) фақат учрашув учун учрашувлар жонга тегди. У энди гап-сўзни эмас, ҳаракатни истайди, бу урушнинг тугашини истайди. Фақат сўнгги икки ҳафта ичида АҚШ маъмурияти россияликлар, украинлар ва европаликлар билан учрашувлар ва суҳбатларга 30 соатдан ортиқ вақт сарфлади”, — деган Ливитт.

Трамп эса бундан бир оз олдин 10 декабр куни Мерц, Макрон ва Стармер билан Украинадаги урушни тўхтатиш мавзусига бағишланган телефон мулоқотида “кескин сўзлар” айтилганини билдирган. АҚШнинг эълон қилинган учрашувда иштироки ҳақидаги саволга у шундай деган: “Биз улар нима билан қайтиб келишига қараб қарор қиламиз. Биз вақтни бекор сарфлашни истамаймиз”.

Германия канцлери идораси 15 декабр куни Украина президенти билан учрашувни эълон қилди — WSJ маълумотларига кўра, худди шу куни Уиткофф Европа давлатлари вакиллари билан музокаралар ўтказиши ҳам кутилмоқда. Мерц ва Зеленский иқтисодий масалалар ҳамда тинчлик музокараларини муҳокама қилади. “Кечқурун муҳокамаларга кўплаб Европа давлатлари ва ҳукуматлари раҳбарлари, шунингдек ЕИ ва НАТОнинг юқори лавозимли вакиллари қўшилади”, — дейилади Германия ҳукумати раҳбари сайтида.