Қўшимча функционаллар
-
Тунги кўриниш
Тошкентда чиқиндиларни қайта ишловчи янги завод қурилади
Тошкент шаҳар ҳокими ўринбосари Абдулазиз Исроилов бошчилигидаги делегация Лондонга ташриф доирасида чиқиндиларни қайта ишлаш соҳасида Ўзбекистон ва Буюк Британия ўртасидаги ҳамкорликка бағишланган бизнес-форумда иштирок этди. Тадбир якунида Тошкентда қурилиши режалаштирилган чиқиндиларни қайта ишловчи завод бўйича битим имзоланди.
Тошкент шаҳар ҳокими ўринбосари Абдулазиз Исроилов бошчилигидаги делегация Лондонда ўтказилган чиқиндиларни қайта ишлаш йўналишида Ўзбекистон–Британия ҳамкорлигига бағишланган бизнес-форумда қатнашди. Бу ҳақда “Дунё” АА хабар қилди.
Мамлакатнинг Буюк Британиядаги элчихонасида ташкил этилган тадбирда Британия Экспортни молиялаштириш агентлиги (UKEF), CDE Group, Kiverco, Fichtner, Operis каби компаниялар вакиллари ҳамда йирик сармоядорлар иштирок этди.
Форум доирасида чиқиндиларни қайта ишлаш бўйича асбоб-ускуналар ишлаб чиқарувчи етакчи Британия компаниялари — CDE Group ва Kiverco томонидан Ўзбекистонда амалга оширилиши режалаштирилган лойиҳалар бўйича тақдимотлар ўтказилди.
Тадбир якунида CDE Group ва Kiverco компаниялари томонидан Тошкентда қурилиши режалаштирилган чиқиндиларни қайта ишловчи завод лойиҳаси юзасидан битим имзоланди.
Шунингдек, Ўзбекистон делегацияси учун Лондонда жойлашган чиқиндиларни қайта ишлаш объектларига ташриф ташкил этилиб, мазкур йўналишда Британиянинг илғор тажрибаси ўрганилди.
