Toshkentda chiqindilarni qayta ishlovchi yangi zavod quriladi

Toshkent shahar hokimi o‘rinbosari Abdulaziz Isroilov boshchiligidagi delegatsiya Londonda o‘tkazilgan chiqindilarni qayta ishlash yo‘nalishida O‘zbekiston–Britaniya hamkorligiga bag‘ishlangan biznes-forumda qatnashdi. Bu haqda “Dunyo” AA xabar qildi.

Mamlakatning Buyuk Britaniyadagi elchixonasida tashkil etilgan tadbirda Britaniya Eksportni moliyalashtirish agentligi (UKEF), CDE Group, Kiverco, Fichtner, Operis kabi kompaniyalar vakillari hamda yirik sarmoyadorlar ishtirok etdi.

Forum doirasida chiqindilarni qayta ishlash bo‘yicha asbob-uskunalar ishlab chiqaruvchi yetakchi Britaniya kompaniyalari — CDE Group va Kiverco tomonidan O‘zbekistonda amalga oshirilishi rejalashtirilgan loyihalar bo‘yicha taqdimotlar o‘tkazildi.

Tadbir yakunida CDE Group va Kiverco kompaniyalari tomonidan Toshkentda qurilishi rejalashtirilgan chiqindilarni qayta ishlovchi zavod loyihasi yuzasidan bitim imzolandi.

Shuningdek, O‘zbekiston delegatsiyasi uchun Londonda joylashgan chiqindilarni qayta ishlash obektlariga tashrif tashkil etilib, mazkur yo‘nalishda Britaniyaning ilg‘or tajribasi o‘rganildi.