iMac Pro қайтмоқда: нималар маълум ва нимани кутиш мумкин?

Фото: Apple

Apple профессионал фойдаланувчилар учун мўлжалланган янги iMac Pro устида иш олиб бормоқда. Маълумотларга кўра, у M5 Pro ёки M5 Max чипи билан жиҳозланади ва тахминан 2026 йилда чиқарилиши кутилмоқда.

Сўнгги iMac Pro модели 2017 йилда чиққан эди: у Intel Xeon 3,2 GHz процессор ва 27 дюймли Retina 5K экран билан жиҳозланган. M1 процессорининг чиқиши билан Apple Intel чипли барча Mac’ларни тўхтатган ва янги iMac Pro лойиҳаси унутилган деб ўйланган. Шу пайтга қадар компанияда Mac Studio, Mac mini ва оддий iMac моделлари профессионал фойдаланувчилар эҳтиёжини қондириб келаётган эди.

Лекин кўриниб турибдики, iMac Pro лойиҳаси ҳали ҳам тирик. Инсайдерлар Apple муҳандислари томонидан ишлатиладиган тест файлларидан янги қурилманинг мавжудлигини тасдиқлашган. Қурилманинг код номи J833c.

Янги iMac Pro 32 дюймгача экран, юқори янгиланиш частотаси, замонавий интерфейслар, жумладан Wi‑Fi 7 ва Thunderbolt 5 билан жиҳозланиши кутилмоқда. Bloomberg нашрининг машҳур инсайдери Mark Gurman ҳам аввалроқ, Apple катта экранли, профессионал фойдаланувчилар учун мўлжалланган iMac устида иш олиб бораётгани ҳақида хабар берган.

Технологиялар тез ўзгараётган бугунги кунда энг сўнгги янгиликлардан хабардор бўлиш муҳим. Рақамли дунёда адашиб қолмаслик ва шундай янгиликларни биринчилардан билиш учун KUN.UZ Texnologiya Телеграм саҳифасини кузатиб боринг.

Тайёрлаган: Аббос Юсуфжонов

#Apple #iMac Pro