Молдова Кишинёв аэропортидаги «Лукойл» терминалини мусодара қилади

Молдова ҳокимияти Россиянинг йирик нефт гиганти «Лукойл»га нисбатан АҚШ ва Буюк Британия санкциялар жорий этганидан кейин, бу компаниядан Кишинёв аэропортидаги ёнилғи терминалини олиб қўйишга қарор қилди. «Биз “Лукойл-Молдова” МЧЖга инвестиция фаолияти учун рухсат бермаслик ҳақида қарор қабул қилдик», — дея Молдова бош вазири Александр Мунтянунинг душанба, 15 декабр куни берган баёнотини Unimedia нашри келтирди. Мунтянунинг айтишича, яқин 20 кун ичида аэропортнинг нефтни қайта ишлашга оид тузилмаси давлат мулкига топширилиши керак — шу тариқа 2005 йилгача бўлган ҳолат тикланади.

Молдованинг давлат хавфсизлиги учун муҳим аҳамиятга эга зоналарда инвестицияларни кўриб чиқиш бўйича кенгаши «Лукойл-Молдова»га мамлакат ҳудудида кейинги инвестиция фаолиятини олиб боришга рад жавобини берди. Unimedia кейинроқ маълум қилишича, қарор компания 2024 йил май ойидан бери белгиланган талабларни бажармагани оқибати ҳисобланади.

Аввалроқ Молдова ҳукумати АҚШ санкциялари сабаб мамлакатдаги «Лукойл» тузилмаларининг ишини тўхтатиш зарурлигини маълум қилган эди. Энергетика вазири Дорин Жунгиету Кишинёв аэропортида самолётларга ёнилғи қуйиш учун мўлжалланган ягона терминал «Лукойл»га тегишли эканини айтди. У Кишинёв АҚШнинг Россия нефт компаниясига қарши санкцияларига қўшилаётганини таъкидлар экан, АҚШдан унинг фаолиятига «муаммо ҳал этилгунига қадар, нефт ресурслари Молдова Республикасига етказиб берилишини бузмаслик ва одамларнинг кундалик ҳаётига таъсир қилмаслиги учун» вақтинчалик рухсат беришни сўраганини билдирди.

Бундан ташқари, Жунгиету маълум қилишича, Молдова ҳукумати «миллий хавфсизлик мулоҳазалари»га кўра «Лукойл»нинг ўз активларини учинчи компанияга сотиш таклифини қабул қилмаган. «Лукойл» фаолияти тўхтатилгандан кейин ёнилғи етказиб беришни таъминлаш учун Молдова Руминия ва Болгария билан музокаралар олиб бормоқда, дея қайд этди мамлакат энергетика вазири.

АҚШ Молия вазирлигининг Хорижий активларни назорат қилиш бошқармаси (OFAC) 22 октябр куни Украинадаги урушни якунлаш бўйича «Россия томонидан тинчлик жараёнига жиддий қизиқиш йўқлиги» сабаб қўшимча санкциялар жорий этди. Янги чекловлар остига фақат «Лукойл» ва «Роснефть» эмас, балки уларнинг 34 та шуъба компанияси ҳам тушди. Блоклаш, шунингдек, «Лукойл» ва «Роснефть» улуши 50 фоизга тенг ёки ундан юқори бўлган барча корхоналарга ҳам татбиқ этилади.