АҚШ ҳарбийлари Венесуэла соҳиллари яқинида яна бир нефт танкерини қўлга олди

Венесуэла ҳукумати танкернинг қўлга олинишини ўғирлик деб атади ва Америка ҳаракатлари жазосиз қолмаслиги учун барча зарур чораларни кўришга, жумладан, БМТ Хавфсизлик кенгашига мурожаат қилишга ваъда берди.

Бу икки ҳафтадан камроқ вақт ичида танкер қўлга олиниши билан боғлиқ иккинчи ҳолатдир. Бу сафар тўхтатилган кема Америка санкциялари остида бўлмаган.

Сўнгги ҳафталарда АҚШ Венесуэла қирғоқларида ҳарбийларини оширмоқдаЮ бу ҳаракатлар наркотрафикка қарши курашга қаратилгани айтилади, бироқ Каракасдагилар Вашингтон Венесуэла табиий ресурслари, биринчи навбатда, нефт устидан назоратни қўлга киритиш учун режимни ўзгартиришга интилмоқда, деб ҳисоблашади.

Сентябр ойидан бери АҚШ Кариб денгизида гиёҳванд моддалар савдосида гумон қилинган 20 дан ортиқ кемага зарба берди, камида 87 киши ҳалок бўлган.

10 декабр куни АҚШ Эрон билан алоқалари учун АҚШ санкциялари остида бўлган Skipper номли йирик нефт танкерини қўлга олганди.

20 декабр кунги операция ҳам АҚШ қирғоқ қўриқлаш хизмати томонидан америкалик ҳарбийлар кўмагида ўтказилди. Махсус тактик гуруҳ ўша пайтда халқаро сувларда бўлган кема саҳнига кириб борган.

«Қўшма Штатлар санкцияларга учраган ва минтақада наркотерроризмни молиялаштириш учун ишлатиладиган нефтнинг ноқонуний кўчирилишини таъқиб қилишда давом этади», – деди Х тармоғида АҚШ ички хавфсизлик вазири Кристи Ноэм етти дақиқалик операция видеосини жойлаштириб.

ОАВга кўра, шанба куни қўлга олинган Centuries кемаси АҚШ санкциялари остида бўлмаган, Трампнинг блокада ҳақидаги буйруғи эса санкция остидаги танкерларга тегишли ҳисобланади.

CNN маълумотларига кўра, Панама байроғи остидаги бу кема Осиё томон сузаётганди. Сўнгги беш йил ичида Хитойга тегишли бўлган танкер Греция ва Либерия байроқлари остида ҳам ҳаракатланган, дея қўшимча қилади BBC Verify.

Венесуэла нефтига нисбатан санкциялар жорий этилган, бироқ баъзи компаниялар, масалан, Американинг Chevron компанияси учун санкциялар режимидан истиснолар мавжуд. Chevron Венесуэланинг кўп қисмларида бурғилаш ишларини олиб боради ва давлат нефт компанияси Petroleos de Venezuela (PDVSA) билан ҳамкорлик қилади.