Трамп Тўқаевга Оқ уйнинг «рамзий калити»ни совға қилди

АҚШ президенти Доналд Трамп Қозоғистон етакчиси Қосим-Жўмарт Тўқаевга бир нечта совға, жумладан, Оқ уйнинг рамзий калити ва Америка етакчисининг дастхати туширилган бейсбол кепкасини юборди. Бу ҳақда Қозоғистон раҳбари матбуот котиби Руслан Желдибай хабар берди.

«Ишонч ёрлиқларини топшириш маросимидан сўнг бўлиб ўтган қисқа суҳбат чоғида АҚШ президенти Доналд Трамп Қозоғистон элчиси Мағжан Илёсов билан жорий йил ноябр ойида Овал кабинетда давлат раҳбари Қосим-Жўмарт Тўқаев билан бўлиб ўтган учрашув ҳақидаги таассуротлари билан ўртоқлашди. Шунингдек, АҚШ президенти Қосим-Жўмарт Тўқаевга бир нечта совға, жумладан, Оқ уйнинг рамзий калити ва унинг дастхати туширилган бейсбол кепкасини юборди», деди Желдибай.

Матбуот котиби, шунингдек, Америка етакчиси Қозоғистон президентига шахсий самимий тилакларини йўллагани, уни ҳурмат қилишини таъкидлаб, «халқаро жараёнларни чуқур ва вазмин тушунадиган ажойиб инсон ва тажрибали давлат арбоби» сифатида таърифлаганини қайд этди.

«Оқ уй калити» - Доналд Трампнинг шахсий ташаббуси

Рамзий «Оқ уй калити»ни топшириш АҚШ расмий дипломатик протоколининг бир қисми эмас. Доналд Трампгача ҳеч бир АҚШ президенти чет эл етакчилари ёки жамоат арбобларига бундай рамзни совға қилмаган. Бундай «калит» юридик кучга эга эмас, Оқ уйга «кириш» имконини бермайди ва АҚШ маъмуриятининг бирорта расмий ҳужжатида мустаҳкамланмаган. У фақат эсдалик совғаси ва шахсий муносабат белгиси сифатида ишлатилади.

Ҳозиргача, Тўқаевдан ташқари Доналд Трамп томонидан Оқ уйнинг рамзий калитини топширишнинг яна бир ҳолати ишончли тарзда тасдиқланган: 2020 йилда Исроил бош вазири Бинямин Нетаняҳуга.

Бир қатор нашрлар, шунингдек, рамзий калитни бошқа сиёсатчилар ёки жамоат арбоблари ҳам олганини таъкидлайди: Украина президенти Володимир Зеленский, Озарбойжон президенти Илҳом Алиев ва миллиардер Илон Маск.