Украина Донецк вилоятидаги Северск шаҳрини тарк этганини тасдиқлади

Украина бош штаби Украина ҳарбийлари Донецк вилоятидаги Северск шаҳридан чиқиб кетганини тасдиқлади. АҚШ таҳлилчилари ҳисоб-китобига кўра, Россия армиясининг Северскка ҳужум қилиши 3,5 йил давом этган.

Фото: Diego Herrera Carcedo/Anadolu

Украина ҳарбийлари Донецк вилоятидаги Северск шаҳридан мажбуран чиқиб кетганини маълум қилди. Бу ҳақда Украина бош штаби 23 декабр, сешанба куни ўзининг Telegram-каналида хабар эълон қилди.

Баёнотда шундай дейилади: “Северск атрофида оғир жанглар давом этмоқда. Россия жонли куч ва техникада сезиларли устунликка эга бўлиб, катта йўқотишларга қарамай, фаол ҳужумкор ҳаракатларни давом эттирмоқда. Жангчиларимиз ҳаётини асраш ва бўлинмаларнинг жанг қобилиятини сақлаб қолиш учун украин ҳимоячилари аҳоли пунктидан чекинди”.

Шунингдек, бош штабга кўра, “ҳужум қилганлар мураккаб об-ҳаво шароитида кичик штурм гуруҳлари билан доимий босим ўтказиб, катта сон жиҳатидан устунлик ҳисобига илгарилай олган”. “Шаҳар ҳали ҳам қўшинларимиз ўқи назоратида қолмоқда. Шаҳарда бўлган оккупантларга зарбалар бериляпти, уларнинг логистикаси узиб қўйиляпти”, — дейилади хабарда.

Украинанинг DeepState лойиҳаси таҳлилчилари Россия Қуролли кучларининг Северскда илгарилагани ҳақида 19 декабрдаёқ хабар берган. Урушгача бу шаҳарда тахминан 11 минг киши яшаган.

DeepState’нинг онлайн хариталарига қараганда, Россия қўшинлари шаҳарни эгаллаб, Северскдан жануб томон 3 кмга илгарилаган. Шаҳардан 30 км ғарбда йирик шаҳар — Славянск жойлашган.

АҚШдаги Урушни ўрганиш институти (ISW) Северскнинг қулагани ҳақида 21 декабрда хабар берган. Институт таҳлилчиларига кўра, РФ Қуролли кучлари Лисичанскдан Северсккача ғарб томон 20 км илгарилаб, шаҳарни эгаллаш учун 41 ой сарфлаган.

Россиялик мустақил таҳлилчи Ян Матвеев таъкидлашича, Северск — 2025 йилда Россия томонидан эгалланган Украинадаги ягона шаҳар бўлган. Волчанск, Купянск, Лиман, Часов Яр, Константиновка, Мирноград, Покровск, Родинское ва Гуляйполе учун жанглар ҳали ҳам давом этмоқда, гарчи РФ Мудофаа вазирлиги уларнинг кўпини эгаллагани ҳақида ҳисобот берган бўлса ҳам.

Матвеевнинг айтишича, энди Украина учун “Резниковка қишлоғи (Северскдан 8 км жануби-ғарбийда) атрофидаги ҳудудларни сақлаб қолиш” муҳим, “Россия қўшинлари Славянск томон янада чуқурроқ ёриб кириб кетмаслиги” учун.

Шунингдек, 23 декабрда Украина армияси вакили Виктор Трегубов телеэфирда Россия қўшинлари Украина чегарасини янги участкада — Суми вилоятидаги чегара ҳудудида жойлашган Грабовское қишлоғи атрофида кесиб ўтганини айтди. Трегубовга кўра, ҳужум кутилмаган бўлган, унда тахминан 100 нафар россиялик ҳарбий қатнашяпти, қишлоқ учун жанглар кетмоқда.

Грабовское Россиянинг Белгород вилояти билан чегарадош бўлиб, Суми шаҳридан 50 км шарқда жойлашган.