Украина Полшага россиялик археологни топширишни сўраб мурожаат қилди

Украина ҳокимияти Санкт-Петербургдаги Эрмитаж музейининг илмий ходими, россиялик археолог Александр Бутягинни экстрадиция қилишни сўраб Варшава округ прокуратурасига расмий сўров киритди. У 1999 йилдан буён Қримдаги археологик қазиш экспедициясига раҳбарлик қилиб келган. Бу ҳақда 23 декабр, душанба куни RMF FM радиоси хабар қилди.

Бутягин Полшада 11 декабр куни Россия томонидан қўшиб олинган яриморолда ноқонуний қазиш ишларини олиб борганликда гумон қилиниб ушланган. Прокуратурада сўроқ қилинганидан сўнг, Полша суди РФ фуқаросини 40 кунга вақтинча ҳибсга олган.

Экстрадиция бўйича қарорни Полша суди қабул қилади. Бундан олдин прокуратура Киевнинг сўрови 1957 йилги Экстрадиция тўғрисидаги Европа конвенцияси қоидаларига мос келиш-келмаслигини баҳолаши керак, деб қайд этади RMF FM. Шундан кейин прокуратура ўз позициясини шакллантириб, судда тақдим этади.

Украинада Бутягин маданий мерос объектида ноқонуний қазиш ишларини ўтказганлик ва унинг объектларини йўқ қилганликда гумонланмоқда, келтирилган зарар 200 млн гривендан ( 4 млн евродан) зиёд, дейилади хабарда. Тергов версиясига кўра, Қрим қўшиб олинганидан кейин Бутягин Эрмитажнинг Мирмекий археологик экспедицияси раҳбари сифатида Украина ҳокимиятидан ҳеч қандай рухсат берувчи ҳужжатлар олмасдан, Керч шаҳридаги “Қадимий Мирмекий шаҳри” деб аталадиган маданий мерос объектида ноқонуний қазиш ишларини амалга оширган.

Кремл матбуот котиби Дмитрий Песков Киев сўрови асосида Полшада россиялик археологнинг ушланишини “ҳуқуқий тирания” деб атади.

РФ ТИВ расмий вакили Мария Захарова эса Эрмитаж ходимини ушлаш ҳақидаги қарор Украина берган “халқаро ҳибсга олиш ордери” асосида қабул қилинганини айтди. “Варшавадаги Россия элчихонаси вакиллари Александр Бутягинни кўриш ва унинг вақтинча ҳибси ҳақидаги суд қарорига шикоят қилаётган адвокати билан алоқада”, — дея маълум қилди Захарова россиялик журналистларга.