“Эпштейн файллари”: Трамп молиячининг самолётида 8 марта учган

АҚШ Адлия вазирлиги вояга етмаганларни жинсий эксплуатация қилиш ва одам савдосида айбланган молиячи Жеффри Эпштейн иши билан боғлиқ ҳужжатларнинг янги тўпламини эълон қилди.

“Эпштейн файллари”нинг янги қисмига кўра, АҚШ президенти Доналд Трамп 1990-йилларда Эпштейннинг хусусий самолётида саккиз марта учган, жумладан хотини ва қизи билан, шунингдек бир марта исми айтилмаган 20 ёшли қиз билан ҳам парвоз қилган. Бу ҳақда The Wall Street Journal газетаси хабар беради.

Ҳужжатлар орасида журналистлар 2019 йилда Ню-Йорк қамоқхонасида Эпштейн вафот этишидан бир неча кун олдин ёзилгани тахмин қилинаётган хатни топган. Хат муаллифи президент “ёш қизларга бўлган муҳаббатни баҳам кўради” ва “ёш гўзалларни яхши кўради”, деб даъво қилади.

Бундан ташқари, NBC телеканали аниқлашича, ҳужжатлар орасида 2020 йилги президент сайловлари арафасида Федерал тергов бюроси (FBI)га келиб тушган аноним хабарлар ҳам бор. Анонимлардан бири 1990-йилларда Трамп ва Эпштейн томонидан зўрланганини айтган аёлни танийди, деб даъво қилган. NBC қайд этишича, FBI бу хабарни тергов қилган-қилмагани номаълум.

АҚШ Адлия вазирлиги аллақачон эълон қилинган баъзи ҳужжатлар “президент Трампга нисбатан ёлғон ва сенсацион айбловларни ўз ичига олади” ва улар “ҳеч қандай ишончга эга эмас”, деб баёнот берган.

Доналд Трампнинг ўзи аввалроқ Эпштейн билан муносабатларни у 2006 йилда илк бор ҳибсга олинишидан олдин узганини таъкидлаган. Оқ уй раҳбари ҳозирча молиячининг хусусий самолётидаги парвозлари ҳақидаги маълумотлар ва ўз манзилига қаратилган янги айбловларга изоҳ бермаган.

Ноябр ойи охирида АҚШ президенти Жеффри Эпштейн иши бўйича барча материалларни эълон қилишни Адлия вазирлигига зиммасига юкловчи қонунни имзолади.

Материалларнинг биринчи қисми 19 декабр куни эълон қилинди — ўшанда Адлия вазирлиги 13 мингта таҳрир қилинган файлни жойлаштирган. Уларнинг катта қисми ё аввал ҳам эълон қилинган, ёки “жабрланувчиларни ҳимоя қилиш” сабабли кескин тарзда таҳрирланган эди. “Эпштейн файллари”даги фотосуратларда Доналд Трампдан ташқари собиқ шаҳзода Эндрю, хонандалар Мик Жаггер ва Майкл Жексон, АҚШ собиқ президенти Билл Клинтон, Google ҳамасосчиси Сергей Брин, Microsoft асосчиси Билл Гейтс, олим ва публицист Ноам Хомский ва яна кўплаб таниқли шахсларни кўриш мумкин.

АҚШ Адлия вазирлиги таъкидлаганидек, бу суратларда машҳурларнинг учраши улар Эпштейннинг “хизматлари”дан фойдалангани ёки болаларни жинсий эксплуатация қилишга жалб этилганини исботламайди.

Материалларнинг иккинчи қисми Адлия вазирлиги сайтида 22 декабр куни пайдо бўлган, аммо бир неча соат ўтиб ўчириб ташланган. Идора “вазирликнинг ёпиқ веб-сайтига рухсатсиз кирилганини” маълум қилди. Таҳрир қилинган материаллар 23 декабр куни қайта эълон қилинган.

“Эпштейн файллари”ни эълон қилиш Доналд Трампнинг сайловолди ваъдаларидан бири бўлган. Бироқ президент лавозимига киришгач, у иш материалларини ошкор этишни чўзиб кела бошлади. Танқидчилар Оқ уй раҳбарини молиячи билан алоқаларини ва эҳтимол, унинг ноқонуний фаолиятига ўзининг дахлдорлигини яширишга уринаётганликда айблайди.

Тергов версиясига кўра, Жеффри Эпштейн одам савдоси (шу жумладан болаларни ҳам) тармоғини уларни жинсий эксплуатация қилиш мақсадида ташкил этган. Унинг ўзи ҳам вояга етмаган қизлардан фойдаланган ва уларни бошқа нуфузли одамларга ҳам тақдим қилган.

2008 йилда Эпштейн фоҳишабозликни ташкил этиш иши бўйича қўлга олинган ва судланган. Ўшанда у тергов билан келишувга борган ва қамоқда бор-йўғи 13 ой ўтирган. 2019 йилда Эпштейн яна одам савдоси айблови билан қайта қўлга олинган. Шундан кўп ўтмай, хабар қилинганидек, у Ню-Йоркдаги қамоқхона камерасида ўз жонига қасд қилган.

2025 йил сентябр ойида АҚШ Демократик партияси аъзолари ўзлари таъкидлашича, Доналд Трамп томонидан имзоланган ва 20 йилдан ортиқ вақт олдин молиячи Эпштейнга юборилган табрик откриткаси суратини эълон қилган.

Откриткада яланғоч аёл танасининг шартли силуэти тасвирланган бўлиб, устига “Жеффри” ва “Доналд” ўртасидаги диалог босиб чиқарилган. У қуйидаги ибора билан якунланади: “Туғилган кунинг билан — ҳар куни янги ажойиб сир бўлсин”.